„დემოკრატიული განვითარების ეროვნული ცენტრი“ საქართველოს შინაგან საქმეთა სამინისტროსა და გენერალურ პროკურატურას მიმართავს.

აღნიშნულ განცხადებას „ნიუპოსტი“ უცვლელად გთავაზობთ:

„შეგახსენებთ, რომ უკანასკნელ პერიოდში ორგანიზაციის „თავისუფალი ზონის“ და მისი წევრების მიმართ, კონკრეტული პირების მიერ განხორციელებული და გამოვლენილი მართლსაწინააღმდეგო ქმედებების გარდა, არსებობს დამატებით სისხლის სამართლის დანაშაულის ნიშნები, რომელთა საფუძველზეც გამოძიების დაწყება სავალდებულოა. შესაბამისად კომპეტენტურ საგამოძიებო ორგანოს არ უნდა გამორჩეს, რომ ორგანიზაციის „თავისუფალი თაობის“ წევრების და მათი აქტივისტების ქმედება, ასევე გაკეთებული საჯარო განცხადებები - სისხლისსამართლებრივი პასუხისმგებლობის დაკისრების დამატებით სამართლებრივ საფუძვლებს შეიცავს.

დამატებით შეგახსენებთ, რომ საქართველოს სისხლის სამართლის კოდექსის 156-ე მუხლის თანახმად ადამიანის დევნა სიტყვის, აზრის გამო, პოლიტიკურ, საზოგადოებრივ და პროფესიულ მოღვაწეობასთან დაკავშირებით, ძალადობით ან ძალადობის მუქარით ისჯება ჯარიმით ან თავისუფლების შეზღუდვით, ასევე თავისუფლების აღკვეთით ვადით სამ წლამდე.

ასევე პოლიტიკური თუ საზოგადოებრივი გაერთიანების საქმიანობისთვის უკანონო ხელის შეშლისთვის ძალადობით ან ძალადობის მუქარით, ამავე კოდექსის 166-ე მუხლი ითვალისწინებს თავისუფლების აღკვეთას ორი წლის ვადით. შესაბამისად მივიჩნევთ, რომ აღნიშნული გათვალისწინებულ უნდა იქნეს გამოძიების მიმდინარეობის პროცესში, ეს კი უზრუნველყოფს მომავალში საზოგადოების უსაფრთხოებას, მშვიდ გარემოს და დაიცავს მოსახლეობას მსგავსი კანონდარღვევისგან“,- აღნიშნულია განცხადებაში.