პრემიერ-მინისტრი პრეზიდენტის მიერ „ფორბსისთვის“ მიცემულ ინტერვიუზე კომენტარისგან თავს იკავებს.

როგორც ჟურნალისტებთან საუბრისას ირაკლი ღარიბაშვილმა განაცხადა, მას ინტერვიუ არ უნახავს და ჟურნალისტებზე დაყრდნობით კომენტარს ვერ გააკეთებს.

„მე არ მინახავს ინტერვიუ, ასე, რომ მე ამის თაობაზე კომენტარს ვერ გავაკეთებ. თუმცა ის კითხვები, რაზეც საუბარი იყო, ამაზე ჩვენ პასუხი გავეცით. თქვენ, ჟურნალისტები არასწორ ინტერპრეტაციას აკეთებთ, ამიტომ არ მინდა თქვენზე დაყრდნობით განცხადება გავაკეთო. მას შემდეგ, რაც წავიკითხავ ინტერვიუს, თუ ჩავთვლი საჭიროდ, გავაკეთებ კომენტარს“, - აცხადებს პრემიერი.

პრეზიდენტმა "ფორბსისთვის" მიცემულ ინტერვიუში ვრცლად ისაუბრა ყოფილ პრემიერთან და მთავრობასთან ურთიერთოის შესახებ.

გიორგი მარგველაშვილის თქმით, შესაძლოა რიგ შემთხვევებში მისი და კოალიციის ლიდერების ლექსიკა განსხვავებული იყოს, თუმცა პოლიტიკური ორიენტირები განსხვავებული არ იქნება.

"არ მგონია, რომ ჩემი თანაგუნდელები რამეს მერჩიან, ან რომ მერჩოდნენ, ალბათ მეც აღელვებული ვიქნებოდი“, - აცხადებს მარგველაშვილი.

მისივე თქმით, დაპირისპირებების პიკი ბიძინა ივანიშვილის განცხადებებს უკავშირდება და არ არის გამორიცხული, მორიგ ინტერვიუს კვლავ მოჰყვეს ვნებათაღელვა.

ავლაბრის რეზიდენციაში მის გადასვლასთან დაკავშირებით კი აცხადებს, რომ არ დაუშვებდა პრეზიდენტის ინსტიტუტის დაკნინებას.