რა ურთიერთობა აქვს პრეზიდენტს საქართველოს ყოფილ პრემიერთან და რამდენი ხანია მას ბიძინა ივანიშვილთან არ უსაუბრია? ყოფილ პრემიერთან ურთიერთობის შესახებ გიორგი მარგველაშვილი ჟურნალ „ფორბსის“ ქართული გამოცემისთვის მიცემულ ინტერვიუში ყვება.

პრეზიდენტის თქმით, შესაძლოა რიგ შემთხვევებში მისი და კოალიციის ლიდერების ლექსიკა განსხვავებული იყოს, თუმცა პოლიტიკური ორიენტირები განსხვავებული არ იქნება. მგველაშვილს და ივანიშვილს ურთიერთობა 10 თვეა არ ჰქონიათ.

„არ მგონია, რომ ჩემი თანაგუნდელები რამეს მერჩიან, ან რომ მერჩოდნენ, ალბათ მეც აღელვებული ვიქნებოდი“, - აცხადებს მარგველაშვილი.

მისივე თქმით, დაპირისპირებების პიკი ბიძინა ივანიშვილის განცხადებებს უკავშირდება და არ არის გამორიცხული, მორიგ ინტერვიუს კვლავ მოჰყვეს ვნებათაღელვა.

ავლაბრის რეზიდენციაში მის გადასვლასთან დაკავშირებით კი აცხადებს, რომ არ დაუშვებდა პრეზიდენტის ინსტიტუტის დაკნინებას.

გიორგი მარგველაშვილის თქმით, მას ბიძინა ივანიშვილთან ურთიერთობა უკვე 10 თვეა არ ჰქონია და შესაბამისად, ბიძინა ივანიშვილის გავლენა მასზე, როგორც პოლიტიკურ ფიგურაზე, შესაძლოა დახასიათდეს მხოლოდ იმ განცხადებებით, რომელსაც ივანიშვილი აკეთებს.

„მის ორივე განცხადებაში იყო ჩემი კრიტიკა, რომელსაც ვერც ვუპასუხებ, რადგან არც მის კრიტიკაში იყო პოლიტიკური კონტექსტი“,- ამბობს გიორგი მარგველაშვილი და მიაჩნია, რომ გუნდის წევრები ტელევიზიების მეშვეობით დიალოგს უნდა მოერიდონ.

საქართველოს პრეზიდენტმა პოლიტიკური ოპონენტების დაჭერაზეც ილაპარაკა. მისი განმარტებით, ამ საკითხზე შეერთებული შტატების სახელმწიფო დეპარტამენტის მიერ გაკეთებულ არცთუ სასიამოვნო განცხადებას საქართველოს ხელისუფლებამ არ უნდა წაუყრუოს და აუცილებლად უნდა გასცეს პასუხი.

ინტერვიუში მარგველაშვილმა უკრაინაში განვითარებულ მოვლენებზეც ილაპარაკა და 2008 წლის 12 აგვისტოც გაიხსენა, როდესაც უკრაინის პრეზიდენტი იუშჩენკო რუსთაველზე იდგა საქართველოს მხარდასაჭერად. პრეზიდენტის თქმით, პეტრო პოროშენკოს ინაუგურაციაზე მისი ჩასვლა ძალზე მნიშვნელოვანი იყო.