"მე რჩევას მივცემდი "ქართული ოცნების" წარმომადგენლებს, რომლებიც კრიტიკაზე უკმაყოფილო სახეებით ხშირად აღშფოთებულები ლაპარაკობენ, ისწავლონ პრეზიდენტისგან“, - ასე აფასებს ექსპერტი გია ხუხაშვილი პრეზიდენტის მიერ გაკეთებულ განცხადებას ყოფილი თანამდებობის პირების სამართლებრივ დევნასთან დაკავშირებით.

ხუხაშვილის განცხადებით, ვინაიდან ქვეყანაში შექმნილ ვითარებაზე შეკითხვა პრეზიდენტს შეერთებული შტატების ელჩმა დაუსვა, ეს ადასტურებს, რომ ამ თემით ამერიკაა დაინტერესებული.

ანალიტიკოსთა განცხადებით, პრეზიდენტის პასუხში ნათლად დადასტურდა, რომ გიორგი მარგველაშვილს ამ საკითხის გარშემო არსებული პრობლემების შესახებ კარგად ესმის.

გიორგი მარგველაშვილის მიერ გაკეთებულ განცხადებას ეხმაურება პოლიტოლოგი ხათუნა ლაგაზიძეც, რომელიც აცხადებს, რომ პრეზიდენტი ცდილობს მისაღები და გასაგები იყოს ჩვენი დასავლელი პარტნიორებისთვის.

მისივე თქმით, დღეს ჩვენს დასავლელ პარტნიორებს საქართველოს ხელისუფლებასთან ურთიერთობაში ბერვი კითხვის ნიშანი აქვთ და თუ ხელისუფლებას უნდა, რომ დარჩეს დასავლეთის პარტნიორად და დასავლეთის დამოკიდებულება მათ მიმართ სულ უფრო არ გაცივდეს, იგი უნდა ეცადოს მაქსიმალურად გადადგას შემხვედრი ნაბიჯები.

შეგახსენებთ, რომ გიორგი მარგველაშვილმა ყოფილი მაღალი თანამდებობის პირების სამართლებრივ დევნასთან დაკავშირებით საქართველოში შეერთებული შტატების ელჩის შეკითხვის საპასუხოდ ისაუბრა.

პრეზიდენტის თქმით, საქართველოს პარტნიორების მიერ გამოთქმული წუხილის გამო თავადაც ღელავს. ყოფილი მაღალი თანამდებობის პირების სამართლებრივ დევნას კი პრეზიდენტი ქვეყნის წინაშე მდგარ გამოწვევად აღიარებს. იგი მიმდინარე პროცესების მონიტორინგში უფრო აქტიურ მონაწილეობას გეგმავს და პოლიტიკოსებსაც მოუწოდებს დისკუსიაში ჩაერთონ.