„ნაციონალური მოძრაობის“ წევრი გოკა გაბაშვილი „თავხედურს“ უწოდებს ეკა ბესელიას განცხადებას იმასთან დაკავშირებით, რომ მიხეილ სააკაშვილი ევროსაბჭოში საჩუქრებით ჩადიოდა.

ამის შესახებ გაბაშვილმა გადაცემა „არჩევანში“ განაცხადა.

„ევროსაბჭო არ არის კრემლი, საიდანაც რაღაცას დაგემუქრებიან და თუ არ გააკეთებ, ტანკებს შემოიყვანენ. ევროსაბჭო არის მეგობრების ორგანიზაცია და ასეთი თავხედური, გაუგონარი პოზიცია, რომ იქ ერთი პარტიაა, სადაც სააკაშვილი საჩუქრებით ჩადიოდა და იქ რაღაც „ჩალიჩით“ ხდება, ნურას უკაცრავად“, - განაცხადა გაბაშვილმა.

აღნიშნულ განცხადებას უმრავლესობის წევრი ზვიად ძიძიგური გამოეხმაურა.

„მინდა გოკას ვუთხრა, რომ თავხედები და შუბლისძარღვგაწყვეტილები თავის გუნდში მოიკითხოს. რაც შეეხება ივანიშვილი-ღარიბაშვილის ფიასკოსთან დაკავშირებით გაკეთებულ განცხადებას, ეს ივანიშვილი რომ არ ახსენონ, არ შუძლიათ. გასაგებია, რადგან ივანიშვილი რომ პოლიტიკურ ასპარზზე არ გამოჩენილიყო, ალბათ, ჩვენი როლები სხვადასხვა იქნებოდა - მე ვიქნებოდი ოპოზიციაში და გაბაშვილი კი ხელისუფლებაში“, - განაცხადა ძიძიგურმა.