საქართველოს პრეზიდენტი, გიორგი მარგველაშვილი ამერიკის სავაჭრო პალატის წევრი კომპანიების 100-მდე წარმომადგენელს ხვდება. შეხვედრა თბილისი მარიოტში ამ წუთებში მიმდინარეობს.

შეხვედრის დროს ამერიკის შეერთებული შტატების ელჩმა საქართველოში რიჩარდ ნორლანდმა, პრეზიდენტს ჰკითხა თუ რა პასუხს გასცემდა სკეპტიკოსებს ამერიკაში, რომლებიც თვლიან, საქართველოს ხელისუფლება წარსულზე უფრო მეტს ფიქრობს, ვიდრე მომავალზე:

„როდესაც იქნება თქვენი პირველი ვიზიტი ვაშინგტონში, პრეზიდენტის რანგში და იმედი მაქვს, ეს უახლოეს მომავალში მოხდება, რას უპასუხებთ სკეპტიკოსებს, რომლებიც ჯერკიდევ არიან ვაშინგტონში და რომლებიც ფიქრობენ, რომ საქართველო ჯერკიდევ შეპყრობილია წარსულით, ვიდრე მომავლით“, - ჰკითხა ნორლანდმა მარგველაშვილს.

პრეზიდენტის განმარტებით ქვეყანაში არსებული პრობლემები მასაც აწუხებს და თუ მთავრობა გამოძიებასა და სასამართლოს უკარნახებს რა მიმართულებით წავიდეს, საქართველოს დემოკრატია არ გაიზრდება:

„ამ კუთხით, ჩვენ რამდენიმე გამოწვევის წინაშე ვდგავართ, ეს გამოწვევები არსებობს და ყველა ჩვენგანი ვაღიარებთ. ჩვენ ვხედავთ, რომ ჩვენი ძვირფასი მეგობრები ამერიკაში და ევროპაში, რომლებიც საქართველოს ნამდვილი მეგობრები არიან და რომლებმაც ძალიან ბევრი რამ გააკეთეს იმისთვის, რომ ჩვენი ქვეყანა წარმატებული ყოფილიყო, არიან შეწუხებული იმით, რაც ხდება საქართველოს პოლიტიკაში და სპეციფიური გამოძიებები, რომლებიც ყოფილი მაღალჩინოსნების წინააღმდეგ მიმდინარეობს. ჩემი პასუხი ამ საკითხებზე არის შემდეგი.

პირველი, მე მართლაც შეწუხებული ვარ ამ ყველაფრით და ყურადღებით ვუსმენ ჩემს დასავლელ კოლეგებს.

მეორე, მე ვფიქრობ, რომ ჩვენ უნდა მივცეთ საზოგადოებას საშუალება, რომ ეს ყველაფერი დაძლიოს ღია დისკუსიით და უფრო მეტად გავაუმჯობესოთ ჩვენი დემოკრატიული სტანდარტები და თუ ჩვენ ვეცდებით ვუკარნახოთ გამოძიებას ან სასამართლოს რა უნდა გააკეთონ, ჩვენ ვერ გადავალთ დემოკრატიის მაღალ დონეზე. ეს შიგნით უნდა გაკეთდეს და სამოქალაქო საზოგადოების როლი ამ დისკუსიაში ძლიერი უნდა იყოს“, - განაცხადა გიორგი მარგველაშვილმა.