„ქართული ოცნების“ აღმასრულებელ მდივნად, ზვიად ჯანყარაშვილის დანიშვნით პრემიერმა, კახი კალაძეს სამაგიერო გადაუხადა.

ამის შესახებ „ნიუპოსტთან“ საუბარში „ნაციონალური მოძრაობის“ წევრმა გივი თარგამაძემ განაცხადა.

მისი თქმით, აქამდე ფინანსებს განკარგავდა კახი კალაძე, როგორც გენ-მდივანი, ამიერიდან კი ამ სფეროს ჯანყარაშვილი ჩაიბარებს.

„ეხლა ხდება გარკვეული რევანში გამომდინარე იქიდან, რომ კალაძემ თავის თავზე ზედმეტი აიღო, მთელი ქვეყნის მასშტაბით არჩევნების თავისი ხალხით მოგება განიზრახა. შედეგად მიიღო მეორე ტური, რაც საკმაოდ მძიმე შედეგი იყო. ეს შემდეგ ღარიბაშვილმა ფულით და პოლიციის ჩარევით გამოასწორა. ეხლა აქვს რევანშის პერიოდი. თამაზაშვილი-ღარიბაშვილის კლანი მთავარ არტერიას ეპატრონება. ეს პორტი „ქართულ ოცნებაში“ არ არსებობდა, ის საგანგებოდ შეიქმნა. როდესაც გაიგეს, რომ ზურა ჯაფაიძე დავნიშნეთ ამ პოსტზე, გაიგეს, რომ ესეთი პოსტი არსებობს პარტიებში. მანამდე კალაძეს, როგორც გენერალურ მდივანს, ეხებოდა ფინანსები და ეს ნაწილიც ჩამოერთვა. ფინანსებს ჯანყარაშვილი მიხედავს. თუ გადავხედავთ კონფიგურაციას, ყველა ფინანსურად საინტერესო პოზიციებზე თამაზაშვილის ხალხი დგას. ასე, რომ კალაძეს შეუძლია ან დაისვენოს ან საერთოდ გაეცალოს ამ სიტუაციას. ვხედავთ, რომ თამაზაშვილი „ქართული ოცნების“ პოლიტსაბჭოში ორ ეგზემპლიარად არის წარმოდგენილი, როგორც ღარიბაშვილი და როგორც ღარიბაშვილი. მოკლეთ რომ ვთქვათ, ჯანყარაშვილის დანიშვნით ღარიბაშვილმა სამაგიერო კალაძეს გადაუხადა“, - განაცხადა თარგამაძემ.

პარტია "ქართული ოცნება - დემოკრატიული საქართველოს" პოლიტსაბჭომ პარტიის აღმასრულებელ მდივნად ზვიად ჯანყარაშვილი გუშინ დაამტკიცა. ჯანყარაშვილს ,,ქართულ ოცნებაში“ ფინანსების და შიდა კონტროლი დაევალება.