ახალი სასწავლო წლიდან ახალგორის სკოლებში, ახალ ისტორიას ასწავლიან. ისტორია დღემდე საქართველოში გადმოცემული წიგნებით ისწავლებოდა, ახლა კი ქართულ ენაზე თარგმნილ სამხრეთ ოსეთის ისტორიას ასწავლიან.

ქართული ისტორიის სახელმძღვანელოებში რუსეთი ოკუპანტი და აგრესორია, საქართველო კი მსხვერპლი, ამიტომაც ახალი სასწავლო წლიდან ახალ ისტორიას ასწავლიან - აცხადებენ სამხრეთ ოსეთის დე-ფაქტო განათლების სამინისტროში.

„იმ კლასების სახელმძღვანელოებთან, რომლითაც ძველ და შუა საუკუნეების ისტორიას ასწავლიან, პრეტენზიები არ გვაქვს, რადგან იქ ყველაფერი დაბალანსებულია და არც ქართულ-ოსურ და არც ქართულ-რუსულ ურთიერთობებზე საუბარი არ არის... თავიდან ვაპირებდით, რომ სამხრეთ ოსეთისა და რუსეთის ისტორია გადაგვეთარგმნა, მაგრამ ვინაიდან ქართულის მცოდნე პროფესიონალები ცოტაა, გადავწყდა, რომ აღნიშნულ კლასებში ისწავლებოდეს სამხრეთ ოსეთის ისტორია საერთო სახელმძღვანელოთი“, - აღნიშნავს სამხრეთ ოსეთის დე-ფაქტო განათლების მინისტრი მარინა ჩიბიროვა.

როგორც „რეზონანსთან“ საუბარში პარლამენტის განათლებისა და კულტურის კომიტეტის თავმჯდომარე ივანე კიღურაძე ამბობს, არანაირი ბერკეტები არ არსებობს არსებული ვითარების შესაცვლელად.

„ქართველებს ასწავლიან ამ დამახინჯებულ ისტორიას?! ვინ მიიღო ეს გადაწყვეტილება... სამწუხაროდ, ჩვენს ხელისუფლებას არ აქვს ბერკეტები, რომ ეს შეიცვალოს“, - ამბობს კიღურაძე.

წყარო: გაზეთი "რეზონანსი"