„თუ ამ ტემპით ვიარეთ, შესაძლოა, ცოტა ხანში გაერო-ს საპარლამენტო ასამბლეაც აქ ჩავატაროთ - სულ მცირე კლიმატის ცვლილებების სამიტი ან რაიმე ამდაგვარი“, - ეს განცხადება საქართველოს პარლამენტის თავმჯდომარემ დავით უსუფაშვილმა დღეს გამართულ ბიუროს სხდომაზე გააკეთა.

პარლამენტის თავმჯდომარე საქართველოში ეუთოს ყოველწლიური საპარლამენტო ასამბლეის ჩატარების საკითხს გამოეხმაურა.

უსუფაშვილის თქმით, აღნიშნული ღონისძიების ჩატარებას სრულიად სახელმწიფო სისტემის მობილიზება დასჭირდება.

"ეუთო-ს საპარლამენტო ასამბლეა ერთ-ერთი ყველაზე გავლენიანი და სერიოზული ორგანიზაცაა, რომელიც საკმაოდ მნიშვნელოვან საკითხებს იხილავს და გაერო-ს შემდეგ ყველაზე დიდ ტერიტორიას ფარავს. არის ძალიან სერიოზული ღონისძიება, რომელსაც ყველა თვალსაზრისით სათანადოდ მომზადებული უნდა შევხვდეთ. 2016 წლის ზაფხული დღევანდელი გადასახედიდან შესაძლოა შორს ჩანს, თუმცა არც ისე შორსაა. კომიტეტი, ცხადია წამყვანი ქვედანაყოფი იქნება, რომელიც მოსამზადებელ პროცესში ჩაერთვება, მაგრამ ეს ისეთი ღონისძიებაა, რომელსაც სრულიად სახელმწიფო სისტემის მობილიზება დასჭირდა როგორც ლიჯისტიკური, ასევე ბევრი სხვა თვალსაზრისით. თუ ამ ტემპით ვიარეთ, შესაძლოა, ცოტა ხანში გაერო-ს საპარლამენტო ასამბლეაც აქ ჩავატაროთ - სულ მცირე კლიმატის ცვლილებების სამიტი ან რაიმე ამდაგვარი", - განაცხადა დავით უსუფაშვილმა.

2016 წლისათვის ეუთო-ს საპარლამენტო ასამბლეის საქართველოში ჩატარდების შესახებ მიღებულ გადაწყვეტილებაზე ისაუბრა ევროპასთან ინტეგრაციის კომიტეტის თავმჯდომარემ.