ნატო-ს ახალი გენერალური მდივნის განცხადებას საქართველოს თავდაცვის მინისტრი აფასებს. ირაკლი ალასანია აცხადებს, რომ სტოლტენბერგის პოზიცია მისასალმებელი და ლოგიკურია.

„ნატო-ს შეუძლია ჯარი განათავსოს ნებისმიერ ადგილას, სადაც მოესურვება“, - ეს კომენტარი იენს სტოლტენბერგმა პოლონეთში გააკეთა.

"უელსის სამიტზე, როგორც ნატოს წვერები ასევე პარტნიორები შევთანმხდით, რომ იმ საფრთხეებს, რაც რეგიონშია რუსეთის აგრესიის კუთხით უნდა დავუპირისპიროთ არამხოლოდ ფინანსური სანქციები, არამედ სამხედრო შემაკავებელი, და სამხედრო შემაკავებელი ნიშნავს იმას, რომ ნატოს წევრებმა უნდა გააძლიერონ საკუთარი სუვერენული ტერიტორიების უფრო დიდი სამხედრო შენაერთებით დაცვა. ბუნებრივია ნატოს ორმხრივ ბაზებს, თუ მრვალმხრივ ბაზებს, თუ ერთობლივ წვრთნებს ეს არის ნატოს გადასაწყვეტი",- განაცხადა ირაკლი ალასანიამ.

ნატო-ს გენერალურმა მდივანმა განაცხადა, რომ სწრაფი რეაგირების ძალებზე მუშაობა უკვე მიმდინარეობს და მომავალი წლიდან ამ კუთხით რამდენიმე მნიშვნელოვანი გადაწყვეტილების მიღება იგეგმება.