კანონმდებლები დღეს პრეზიდენტის მიერ პარლამენტისთვის ხელმეორედ წარდგენილი უზენაესი სასამართლოს მოსამართლეობის კანდიდატებს მოუსმენენ.

ნინო ბაქაქურთან და ზურაბ ძლიერიშვილთან შეხვედრა იურიდიული კომიტეტის სხდომაზეა დაგეგმილი.

უმრავლესობის ნაწილი ვაკანტურ ადგილებზე მათ დამტკიცებას ემხრობა, ნაწილს საბოლოო გადაწყვეტილება ჯერ არ მიუღია. ჯერჯერობით უცნობია მხარს დაუჭერს თუ არა უმცირესობა კანდიდატებს.

„პოზიცია მიღებულია, ის გადაწყვეტილება, რომელიც ჩვენ თავის დროზე მხარდაჭერასთან დაკავშრებით მივიღეთ, მე პირადად მაქვს, თუ დამატებით დასჭირდება ვინმეს რაიმე ინფორმაცია, ახლა არის შესაძლებლობა მიიღონ ეს ინფორმაცია. ძალიან ჯანსაღი პროცესია“, - განაცხადა ეკა ბესელიამ.

თინა ხიდაშელის განმარტებით აღნიშნული გადაწყვეტილება მეტად მნიშვვნელოვანია და მისთვის გასაგებია კოლეგების სიფრთხილე.

„ძალიან მნიშვნელოვანი გადაწყვეტილება არის და რაც ხელისუფლებაში ვართ პირველად გვიწევს უზენაესი სასამართლოს წევრების შერჩევა. იმ ფონზე, რაც ქვეყანაში სასამართლო ხელისუფლებას სჭირდა, რა თქმა უნდა პასუხისმგებლობა არის სრულიად მაღალი და ჩემთვის ეს გასაგებია, რომ უფრო მეტი სიფრთხილით ეკიდებიან ჩვენი კოლეგები. ამ ადამიანებს უმრავლესობის მხარდაჭერა ექნებათ“, - განაცხადა თინა ხიდაშელმა.

საპარლამენტო უმცირესობის წევრის, გივი თარგანაძის განმარტებით, უმცირესობა არ ცდილობს უმრავლესობას საკუთარი აზრი მოახვიოს თავზე:

„ჩვენ არ ვახვევთ ჩვენს აზრს და ვაძლევთ სრულ თავისუფლებას უმრავლესობას, მიიღონ გადაწყვეტილება. თუმცა, ჩვენი ინტერესი, ისევე როგორც საზოგადოების, მდგომარეობს იმაში, რომ იქნას წარმოდგენილი არგუმენტები უკმაყოფილების ან არა. სხვა შემთხვევეაში ეს იქნება კიდევ ერთი დასტური იმისა, რომ ხდება კანდიდატების ჩაგდება მხოლოდ იმიტომ, რომ ისინი არის პრეზიდენტის მიერ წარმოდგენილი, რაც არის უბრალოდ ავადმყოფობა“, - აღნიშნა გივი თარგამაძემ.