"თუ ამ ტემპით ვიარეთ, შესაძლოა, გაერო-ს საპარლამენტო ასამბლეაც აქ ჩავატაროთ - სულ მცირე კლიმატის ცვლილებების სამიტი". - განაცხადა დავით უსუფაშვილმა ბიუროს სხდომაზე.

დეპუტატებმა ბიუროს სხდომაზე 2016 წლისათვის ეუთო-ს საპარლამენტო ასამბლეის საქართველოში ჩატარდების შესახებ მიღებულ გადაწყვეტილებაზე იმსჯელეს.

ევროპასთან ინტეგრაციის კომიტეტის თავმჯდომარის, ვიქტორ დოლიძის განცხახადებით, საორგანიზაციო საკითხების განსაზღვრის მიზნით, ერთ თვეში საქართველოში ექსპერტთა ჯგუფი ჩამოვა. მისივე თქმით, ასამბლეის სხდომა შესაძლოა ბათუმში ჩატარდეს.

"ეუთო-ს საპარლამენტო ასამბლეა ერთ-ერთი ყველაზე გავლენიანი და სერიოზული ორგანიზაცაა, რომელიც საკმაოდ მნიშვნელოვან საკითხებს იხილავს და გაერო-ს შემდეგ ყველაზე დიდ ტერიტორიას ფარავს. არის ძალიან სერიოზული ღონისძიება, რომელსაც ყველა თვალსაზრისით სათანადოდ მომზადებული უნდა შევხვდეთ. 2016 წლის ზაფხული დღევანდელი გადასახედიდან შესაძლოა შორს ჩანს, თუმცა არც ისე შორსაა. ეს ისეთი ღონისძიებაა, რომელსაც სრულიად სახელმწიფო სისტემის მობილიზება დასჭირდა", - განაცხადა პარლამენტის თავმჯდომარემ დავით უსუფაშვილმა პარლამენტის ბიუროს სხდომაზე.

როგორც ბიუროს სხდომაზე გახდა ცნობილი, 2017 წელს საქართველოში შესაძლოა ნატო-ს საპარლამენტო ასამბლეის სხდომაც გაიმართოს. "თუ ამ ტემპით ვიარეთ, შესაძლოა, ცოტა ხანში გაერო-ს საპარლამენტო ასამბლეაც აქ ჩავატაროთ - სულ მცირე კლიმატის ცვლილებების სამიტი ან რაიმე ამდაგვარი", - განაცხადა დავით უსუფაშვილმა.