ოპოზიციური პარტიები საარჩევნო-პოლიტიკური გარემოს გასაუმჯობესებლად ერთობლივ ფორმატს ქმნიან

პოლიტიკა - 15:57, 06 Oct, 2014

961

ინტერპარტიული ჯგუფი აქცენტს საარჩევნო კოდექსში არსებულ რამდენიმე საკითხზე აკეთებს. შემუშავებულია აუცილებელი ცვლილებების გარკვეული ჩამონათვალიც, მათ შორისაა საარჩევნო სისტემის ცვლილება, საარჩევნო სიების ბიომეტრიული ტექნოლოგიებით ფორმირება, პოლიტიკურ სუბიექტებს შორის თანაბარი საარჩევნო პირობების უზრუნველყოფა და ადმინისტრაციული რესურსით მანიპულაციის აღკვეთა.

ბაჩუკი ქარდავა, ედპ-ს ლიდერი - ახალი ხელისუფლება ამას კარგად ახერხებს. ის იყენებს ადმინისტრაციულ რესურსს და ეს არის ძალიან დიდი ციფრი, რომელიც არჩევნების შედეგებზე გავლენას ახდენს. ეს არის ბიომეტრიული საარჩევნო სიები. ის ადამიანები, ვინც დღეს ხელისუფლებაში არიან, სწორედ ისინი აყენებდნენ ამ საკითხს ოპოზიციაში ყოფნის დროს“, - განაცხადა ედპ-ს ლიდერმა ბაჩუკი ქარდავამ.

ჯონდი ბაღათურია, „ქართული დასის“ თავმჯდომარე - ყველა თანხმდება იმაზე, რომ მაჟორიტარები, რომელიც თავის ოლქებში ფეოდალებად გადაიქცნენ და სისხლს სწოვენ ხალხს, ეს სისტემა უნდა გაუქმდეს.

ნინო ბურჯანაძე, „გაერთიანებული დემოკრატიული მოძრაობის“ თავმჯდომარე - თბილისში 41%-მა დაუჭირა მხარი „ქართულ ოცნებას“, ხოლო საკრებულოში მათ 75%-ზე მეტი ხმა აქვთ. ეს ნიშნავს იმას, რომ რეალურად საკრებულო არ ასახავს საზოგადოების რეალურ განწყობას.

„ნაციონალურ მოძრაობაში“ მიიჩნევენ, რომ ამ შეხვედრებს შედეგი არ ექნება, რადგან ხელისუფლება კანონს არ შეცვლის.

„ამ ფორმატში შემოთავაზება არ გვაქვს. ჩემი აზრით ხელისუფლება ამ პროცესს გაწელავს. ხელისუფლება არ შეცვლის კანონს. ამის ნათელი მაგალითია ადგილობრივი თვითმმართველობის კანონის არ შეცვლა. დაიწყებს თამაშს, იტყვის, რომ აქ არის არასამაპრალემნტო ოპოზიცია, იქ არის საპარლამენტო ოპოზიცია... მთელი არსი იქნება, რომ ეს პროცესი გაიწელოს და ცვლილება არ შევიდეს“, - განაცხადა „ნაციონალური მოძრაობის“ წევრმა მიხეილ მაჭავარიანმა.

ინტერპარტიული ჯგუფის შეხვედრა დღეს სასტუმრო ,,რედისონში" გაიმართა.