პრეზიდენტის მიერ წარდგენილ უზენაესი სასამართლოს მოსამართლეობის კანდიდატებს ნინო ბაქაქურსა და ზურაბ ძლიერაშვილს პარლამენტი დღეს მოუსმენს.

შეხვედრა იურიდიულ საკითხთა კომიტეტის სხდომის ფარგლებში გაიმართება. დეპუტატთა განცხადებით, თუ რა გადაწყვეტილებას მიიღებს პარლამენტი ეს საკომიტეტო მოსმენის შემდეგ გახდება ცნობილი.

საპარლამენტო უმცირესობაში აცხადებენ, რომ უმრავლესობა კანდიდატებს მხარს არ უჭერს იმიტომ, რომ ისინი პრეზიდენტის მიერ არიან წარდგენილნი.

გიორგი მარგველაშვილმა უზენაეს სასამართლოში მოსამართლეობის ორ ვაკანტურ ადგილზე ნინო ბაქაქურისა და ზურაბ ძლიერაშვილის კანდიდატურები პარლამენტს უკვე მეორედ წარუდგინა. თავდაპირველად მათი წარდგენა პარლამენტის საგაზაფხულო სესიაზე მოხდა. მიუხედავად იმისა, რომ ორივე კანდიდატმა საპარლამენტო კომიტეტებში მხარდაჭერა მიიღო, პლენარულ სხდომაზე კენჭისყრისას მხარი არ დაუჭირეს. პარლამენტი უზენაესი სასამართლოს მოსამართლეებს პრეზიდენტის წარდგინებით, არა ნაკლებ 10 წლის ვადით, სიითი შემადგენლობის უმრავლესობით ირჩევს.