ჟენევაში მიმდინარე ეუთოს საპარლამენტო ასამბლეის საშემოდგომო სესიაზე გადაწყდა, რომ 2016 წელს ევროპის უშიშროებისა და თანამშრომლობის ორგანიზაციის წლიური სესია საქართველოში გაიმართება.

„ნიუპოსტმა“ აღნიშნულ საკითხზე კომენტარი ეუთოს საპარლამენტო ასამბლეის ვიცე-პრეზიდენტს, საქართველოს პარლამენტის წევრ გიგი წერეთელს სთხოვა.

„ჟენევაში მიმდინარეობს ეუთოს საპარლამენტო ასამბლეის საშემოდგომო სესია, რომელიც საკითხების ფართო სპექტრს განიხილავს, მათ შორის ევროპის უსაფრთხოების საკითხები, ასევე უკრაინაში მიმდინარე მოვლენები და სხვა. სესიაზე გამართულ დებატებში, რომელშიც საქართველოს დელეგაციამ საკმაოდ აქტიური მონაწილეობა მიიღო. საპარლამენტო ასამბლეის სესიაზე განიხილებოდა ასევე ეუთოს მომავალი სხდომების საორგანიზაციო საკითხებიც. სწორედ ამ საკითხების განხილვისას გადაწყდა, რომ 2016 წელს, ეუთოს ყველაზე მნიშვნელოვანი ღონისძიება - წლიური სესია საქართველოში გაიმართება,“ - აღნიშნა გიგი წერეთელმა.

მისი თქმით, წლიური სესიის ჩატარების ადგილთან დაკავშირებით იყო საქართველოსა და გერმანიის კანდიდატურა, მაგრამ საბოლოოდ საქართველოს კანდიდატურამ გაიმარჯვა.

„ჩვენმა დელეგაციამ უკეთ დაასაბუთა, რომ მნიშვნელოვანი იქნებოდა სხდომა საქართველოში გამართულიყო. გამომდინარე რეგიონში არსებული ვითარებიდან, რომ ჩვენი ქვეყანა არის აღმოსავლეთ პარტნიორობის წევრი და მიისწრაფის ევროინტეგრაციისაკენ, ეუთოს ხელმძღვანელობამ საჭიროდ ჩათვალა, რომ სესია სწორედ ჩვენს ქვეყანაში გამართულიყო. გათვალისწინებული იყო ის ფაქტიც, რომ საქართველოს მეტი თანადგომა და მხარდაჭერა სჭირდება, მის წინაშე არსებული ძალიან ბევრი გამოწვევა საგარეო და შიდაპოლიტიკური, დემოკრატიული განვითარების თვალსაზრისით.“ - აცხადებს გიგი წერეთელი.

მისი თქმით, საქართველოს აქვს ამგვარი ღონისძიებების გამართვის გამოცდილება - 2012 წელს ჩვენს ქვეყანაში ეუთოს ეკონომიკური ფორუმი გაიმართა და იმედოვნებს, რომ 2016 წელსაც ჩვენი ქვეყანა ღირსეულ მასპინძლობას გაუწევს ამ მნიშვნელოვან ფორუმს.

„ეს ეუთოს მთავარი ღონისძიებაა და გვეყოლება ძალიან ბევრი სტუმარი 57 ქვეყნიდან, თუმცა რუსეთის წარმომადგენლებზე ვერაფერს გეტყვით,“ - აღნიშნა გიგი წერეთელმა.

როგორც გიგი წერეთელმა განაცხადა, ქართულ დელეგაციას ჟენევაში, გარდა სესიის მუშაობვაში მონაწილეობისა, ძალიან ბევრი შეხვედრა ჰქონდა სხვადასხვა ქვეყნების წარმომადგენლებთან და ეუთოს საპარლამენტო ასამბლეის პრეზიდენტთან. იყო გამოსვლები როგორც უკრაინის, ასევე საქართველოს საკითხებზე, ჩვენი ქვეყნის ადგილზე ევროპული უსაფრთხოების სისტემაში.