სეპარატისტების მიერ ენგურზე გამშვები პუნქტების დაკეტვას ღარიბაშვლი ეხმაურება

პოლიტიკა - 11:42, 04 Oct, 2014

2338

აფხაზეთის დე-ფაქტო ხელისუფლების ინიციატივას, ენგურზე საკონტროლო-გამშვები პუნქტების შემცირების შესახებ ირაკლი ღარიბაშვილი გამოეხმაურა.
პრემიერის შეფასებით, მსგავსი ნაბიჯები შერიგების პროცესს არ დაეხმარება.
„ჩვენ გვსურს რეალურად შერიგების პროცესის დაწყება ჩვენს აფხაზ და ოს ძმებთან ერთად. ის, რაც მოხდა ბოლო ორი ათწლეულის განმავლობაში, არის ჩვენი ერის ტრაგედია. მიმაჩნია, რომ ეს არ არის გონივრული გადაწყვეტილება და აუარესებს ჩვენი მოქალაქეების მდგომარეობას ადგილზე. ჩვენ ვართ მაქსიმალურად გახსნილი, რომ შერიგების პროცესი დაჩქარდეს და აღდგეს ნდობა აფხაზებსა და ქართველებს, ოსებსა და ქართველებს შორის", - განაცხადა ირაკლი ღარიბაშვილმა.
პრემიერ-მინისტრის განმარტებით, მთავრობა მზად არის ჰუმანიტარული დახმარების გასაწევად. როგორც მთავრობის მეთაურმა აღნიშნა, შემთხვევითი არ არის, რომ გამყოფი ხაზის მიმდებარედ შენდება მულტიფუნქციური საავადმყოფო, სადაც აფხაზეთში მცხოვრები ადამიანები უფასოდ მკურნალობას შეძლებენ; ასევე, შენდება მრავალფუნქციური სავაჭრო კომპლექსი, რათა გაადვილდეს მიმოსვლა, აღდგეს ნდობა, სავაჭრო-კულტურული და ხალხთა შორის ურთიერთობები.
„ჩვენ მათ ინიციატივას კიდევ უფრო მეტი სიყვარულით და სითბოთი ვპასუხობთ. თუმცა, მსგავსი ინიციატივები არ დაეხმარება ჩვენი შერიგების პროცესს, კიდევ უფრო აუარესებს და ართულებს მას", - აღნიშნა ირაკლი ღარიბაშვილმა.
შეგახსენებთ, აფხაზეთის თვითგამოცხადებულ რესპუბლიკის ე.წ პრეზიდენტს, რაულ ხაჯიმბას საქართველოსთან საზღვრის უფრო მეტად გაკონტროლება მოტივით, მდინარე ენგურზე მოქმედი 6 განშვები პუნქტიდან 5 დაკეტვა სურს. საზღვრის გადაკვეთა მხოლოდ გალის რაიონის მაცხოვრებლებისთვისაა შესაძლებელი, ძველი საბჭოთა პასპორტებით ან აფხაზეთის ე.წ მთავრობის მიერ გაცემული № 9 დოკუმენტით.