საქართველოს თავდაცვის ყოფილმა მინისტრმა, დიმიტრი შაშკინმა, „ნიუპოსტთან“ საუბარში, ევროსაბჭოს საპარლამენტო ასამბლეის მიერ საქართველოს შესახებ დამტკიცებული რეზოლუცია შეაფასა.

ყოფილი მინისტრი აღნიშნულ რეზოლუციას ნეგატიურს უწოდებს და აცხადებს, რომ ნეგატიური პირველ რიგში საქართველოს მთავრობისთვის და ქვეყნისთვის იქნება.

,,როდესაც ასეთი გადაწყვეტილებაა მიღებული, ჩვენ ჩვენს თავს უნდა დავუსვათ მხოლოდ ერთი შეკითხვა: რამე არის რაც წერია ამ რეზოლუციაში და არ შეესაბამება სიმართლეს?! ბუნებრივია, პასუხი არის, რომ - არა! და ჩვენ, ყველა ნორმალურმა ადამიანმა, რომელიც ცხოვრობს ამ ქვეყანაში, ეს იცის. აქედან გამომდინარე, როდესაც კეთდება სხვადასხვა კომენტარები ასამბლეის გადაწყვეტილებასთან დაკავშირებით, ზოგი ცდილობს, რომ ამ დოკუმენტის მნიშვნელობა ქვემოთ დაწიოს, ზოგი ცდილობს, რომ სხვა მიმართულებით გადაიყვანოს საუბარი, მაგრამ ფაქტი ერთია - სამწუხაროდ, ყველაფერი, რაც იქ წერია არის ჩვენი რეალობა და იქ არის ასახული ის მძიმე ფაქტები, რომელიც არის ქვეყანაში. არ აქვს მნიშველობა თქვენ მოგწონთ თუ არა ძველი მთავრობა, ან მოგწონთ თუ არა ახალი მთავრობა - ფაქტი არის ის, რომ ყველაფერი, რაც იქ წერია სამწუხარო რეალობაა“,- განაცხადა დიმიტრი შაშკინმა.

შაშკინი მიიჩნევს, რომ ისეთი განცხადებები, როგორიც ამერიკამ და ევროპამ, ბოლო ერთი თვის მანძილზე საქართველოს მისამართით გააკეთეს, ბოლო 12 წლის განმავლობაში არ გაკეთებულა.

„სახელმწიფო დეპარტამენტის განცხადების მერე, ეს არის უკვე ევროპის განცხადება საქართველოს მიმართ. მე მინდა ყველას შევახსენო, რომ ჩვენსა და რუსეთს შორის დგას ორი ფაქტორი: ეს არის ქართული ჯარი და ეს არის ჩვენი პარტნიორების მხარდაჭერა, თუ ვინმეს აქვს განცდა, რომ რუსეთმა გადაიფიქრა თბილისის აღება და ყველანაირ მომენტს გამოიყენებს ამისთვის, როგორც ცდილობდა ამის გაკეთებას 2008 წელს, ძალიან ცდება. სამწუხაროდ, სანამ პუტინი ხელისუფლებაში იქნება, რუსეთი არის ჩვენი მტერი სახელმწიფო და ჩვენს შორის და ამ ბოროტების იმპერიას შორის დგას ჩვენი ჯარი, რომელიც არის ძალიან პატარა და შეუძლია შეასრულოს კონკრეტული მისია და ასევე დგანან ჩვენი პარტნიორები ევროპაში და ამერიკაში. ერთი თვის განმავლობაში ჩვენ მივიღეთ ძალიან მკვეთრი ნეგატიური სიგნალი ამერიკის შეერთებულ შტატებისგან და ახლა ევროპისგან, ანუ როგორც ვხედავთ ჩვენი მთავარი ორი მოკავშირე, ამერიკაც და ევროპაც მიუთითებს იმ პრობლემებზე, რომელიც ჩვენ გაგვაჩნია და ახლა უკვე მთავრობის გადასაწყვეტია, შეაფასებს თუ არა რეალისტურად ამ გზავნილებს თუ კვლავ ეცდება, როგორც თავის დროზე ამერიკის შეერეთებული შტაბების სახელმწიფო დეპარტამენტის პირველ განცხადების იგნოირირება გააკეთა, ამ განცხადებასაც იგნორიება გაუკეთოს.“,- აღნიშნა შაშკინმა და დასძინა, რომ ქართული საზოგადოება დგას უსერიოზულესი პრობლემის წინაშე. მისივე თქმით, პრობლემა ბევრად უფრო მძიმეა, ვიდრე ერთი შეხედვით ჩანს - „ჩვენ რეალურად ვდგავართ კატასტროფის ზღვარზე ჩვენს მთავარ პარტნიორებთან ამერიკასთან და ევროპასთან".