ისნის რაიონის გამგებლის მოადგილის, ბესიკ დონაძის ინფორმაციით, გამგებელი ვახტანგ ქიზიყურაშვილი მასზე ზეწოლას ახორციელებდა.

დონაძის განაცხადებით, ქიზიყურაშვილის ნდობით აღჭურვილი პირები სთხოვდნენ მას, დაეტოვებინა სამსახური და წლის ბოლომდე ხელფასს საკუთარი ჯიბიდან მისცემდნენ.

„ზეწოლას ახორციელებდნენ როგორც გამგებელი ვახტანგ ქიზიყურაშვილი, ასევე მისი ნდობით აღჭურვილი პირები.

გელა კვირიკაძე მეუბნეოდა, რომ შენ დაწერე განცხადება და წადი სამსახურიდან და წლის ბოლომე ჩემი ჯიბიდან გადაგიხდი 1000 ლარს. მითხრა, რომ ზევიდან ძალიან ნერვიულობენ, რომ განცხადებას არ წერო. შენს ადგილს ელოდებიან უკვე გარკვეული ადამიანებიო. პარტია აწვება გამგებელს და გამგებელმა რა ქნას? მსგავსი საუბრები იყო“, - განაცხადა დონაძემ.

ბესიკ დონაძის ინტერესებს საქართველოს ახალგაზრდა იურისტთა ასოციაცია იცავს. საია-ში ადასტურებენ, რომ მათ გააჩნიათ ამ ფაქტზე კონკრეტული მტკიცებულებები და აპირებენ ინფორმაცია პროკურატურას მიაწოდონ, რათა ამ ფაქტზე გამოძიება დაიწყოს. ასოციაცია პროკურატურას საქმით დაინტერესებისკენ მოუწოდებს.