აფხაზეთის თვითგამოცხადებულ რესპუბლიკის ე.წ პრეზიდენტს, რაულ ხაჯიმბას საქართველოსთან საზღვრის უფრო მეტად გაკონტროლება სურს. ის თვლის, რომ მდინარე ენგურზე, მხოლოდ ერთი გამშვები პუნქტი უნდა ფუნქციონირებდეს. დანარჩენები კი აუცილებლად უნდა დაიკეტოს.

სააგენტო "რია ნოვოსტის" ინფორმაციით, ამის შესახებ ხაჯიმბამ პარტია „აფხაზეთის სახალხო ერთობის“ ფორუმზე განაცხადა.

„სახელმწიფო საზღვარი საქართველოსთან მდინარე ენგურზე უნდა გამაგრდეს, იქ უნდა იფუნქციონიროს მხოლოდ ერთმა გამშვებმა პუნქტმა, სახელმწიფოს უსაფრთხოების ინტერესების გათვალისწინებით ყველა სხვა პუნქტი აუცილებლად დაიკეტება“ აცხადებს პარტიის პრეს-სამსახური.

ამ დროისთვის მდინარე ენგურზე მთავარი გამშვები პუნქტის პარალელურად, 5 პუნქტი ფუნქციონირებს, ოთხი საფეხმავლო და ერთი საავტომობილო. ხუთი დამატებითი გამშვები პუნქტი 2013 წლის მაისში გაიხსნა. საზღვრის გადაკვეთა მხოლოდ გალის რაიონის მაცხოვრებლებისთვისაა შესაძლებელი, ძველი საბჭოთა პასპორტებით ან აფხაზეთის ე.წ მთავრობის მიერ გაცემული № 9 დოკუმენტით.