ტელეკომპანია "რუსთავი 2"-ის გენერალური დირექტორი ნიკა გვარამია "რუსთავი 2"-ის ჟურნალისტის ძმის საქმეზე პრემიერ-მინისტრის მიერ გაკეთებულ განცხადებას გამოეხმაურა.

გვარამია ფიქრობს, რომ ტელეკომპანია რუსთავი 2-ის ჟურნალისტის ძმის საქმე მთავრობას სერიოზულ კონტროლზე აქვს აყვანილი, რაც იმას ნიშნავს, რომ პროკურატურა ამ საქმეში მიუკერძოებელი არ არის და ეს საქმე უკვე მართულია.

„ამ ვითარებაში, როდესაც პრემიერმა დაწვრილებით იცის რუსთავი 2-ის ერთ-ერთი ჟურნალისტის არასრულწლოვანი ძმის ისტორია, არა მხოლოდ ის, თუ რა შეუფარდა მას პირველი ინსტანციის სასამართლომ, შემდეგ უკვე სააპელაციო სასამართლომ, არამედ დაწვრილებით გადმოსცემს ეთერში მილიონობით აუდიტორიის წინაშე ამ დანაშაულის დეტალებს, არღვევს არასრულწლოვანის უდანაშაულობის პრეზუმფციას და მას უკვე აცხადებს დამნაშავედ. პლუს რაღაც შეთქმულების თეორიებს მისდევს და ადანაშაულებს არა მხოლოდ რუსთავი 2-ს, არამედ მთელ მედიას რაღაც შეთქმულების მოწყობაში, რომ ეს ფაქტი არ გაგვეშუქებინა. ვფიქრობ, რომ ჩვენი ჟურნალისტის ძმის საქმე სერიოზულ კონტროლზე აქვს აყვანილი მთავრობას, რაც იმას ნიშნავს, რომ პროკურატურა ამ საქმეში მიუკერძებელი არ არის. და შესაბამისად, ვფიქრობთ, რომ ეს საქმე უკვე მართულია.

ამას თუ დავამატებთ იმ კნოტექსტს, რომელიც სასამართლოში იყო, კერძოდ, საქმის განმხილველი მოსამართლის ცინიკურ განცხადებას, რომ იმედია რუსთავი 2 ამ საქმესთან დაკავშირებით არ იტყვის, რომ ამ ბიჭს არასრულწლოვანს „ტაქსის მძღოლი ჩაუდეს“. თავის მხრივ, ცხადი ხდება, რომ სასამართლოც ერთი მხრივ და მეორე მხრივ, პროკურატურაც გამოხატავენ თავის დამოკიდებულებას და ისინი არ არიან ობიექტურები“, - განაცხადა გვარამიამ „კურიერთან“ საუბრისას.

პრემიერ-მინისტრი ირაკლი ღარიბაშვილი რუსთავი 2-ის ჟურნალისტის ძმის საქმეს გამოეხმაურა. მისი თქმით, ეს საქმე არც რუსთავი 2-მა და არც სხვა ტელევიზიებმა არ გააშუქეს, რაც იმას ნიშნავს, რომ ისინი სიცრუის ტირაჟირებას ეწევიან.