„ნაციონალური მოძრაობის“ წევრები მიიჩნევენ, რომ „თავისუფალი ზონის“ წინააღმდეგ მიმდინარე აქცია ხელისუფლებისგან მართული იყო.

„ნიუპოსტთან“ საუბარში უმცირესობის წევრი დავით დარჩიაშვილის თქმით, აღნიშნულ პროცესებში ფიგურირებენ ადამიანები, ვისაც რუსულ სამსახურებთან მჭიდრო თანამშრომლობა ჰქონდათ.

„რამდენიმე დღეა პროვოკაციების ახალი ტალღა აქვთ. არის ზეწოლის მცდელობები ოპოზიციაზე და განსხვავებული აზროვნების ადამიანებზე. ამ შემთხვევაში ზეწოლა მიმდინარეობს „თავისუფალ ზონაზე“. ეს ყველაფერი წინასწარ დაგეგმილია, ვერ ვიტყვი, რომ მაინცდამაინც კარგად. ეს ძალიან სარისკოა ჩვენი ქვეყნისთვის. ამ ყველაფერში ისეთი პიროვნებები ფიგურირებენ, რომლებსაც რუსულ სამსახურებთან ჰქონდათ მჭიდრო თანამშრომლობა. ეს არის დიდი უტვინობა, რომელიც მათ ბუმერანგივით შეუბრუნდებათ“, - განაცხადა დარჩიაშვილმა.

თანაგუნდელის მოსაზრებას ეთანხმება ნიკა მელიაც და ამბობს, რომ „თავისუფალი ზონის“ წინააღმდეგ ხელისუფლების მიერ შექმნილი ძალადობრივი ჯგუფები მოქმედებენ.

როგორც „ნიუპოსტთან“ საუბარში მელია აცხადებს, მსგავსი აქციები და დაპირისპირება ქვეყნის სტაბილურობას დაანგრევს.

„სამწუხაროდ ის ყველაფერი რაც დღეს და გუშინ მოხდა არის მართული პროცესი ხელისუფლების მეცადინეობით. ხელისუფლებამ შექმნა ძალადობრივი ჯგუფები. ეს იმას ნიშვანს, რომ ხელისუფლებას არ სურს სამოქალაქო მშვიდობა, მას სურს დესტაბილიზაცია. იმის მაგივრად, რომ პროცესების ნორმალიზებას შეუწყოს ხელი, იგი ახალისებს დაპირისპირებას. მე მოუწოდებ მათ რომ გონს მოეგონ.იმედია, გაათვითცნობიერებენ, რომ ისინი არიან ხელისუფლებაში. ჩვენ გვყავს ხელისუფლება, რომელიც არის „ნაციონალური მოძრაობის“ ოპოზიცია. ასეთ სიტუაციაში მსგავს აქციებს ადგილი ექნება, რაც დაანგრევს ჩვენი ქვეყნის სტაბილურობას. ეს არ არის ცალკეული ჯგუფების პროტესტის გამოხატვა. ეს არის მართული პროცესი ხელისუფლების მხრიდან. ხელისუფლება იმართება ერთი ადამიანის მხრიდან. არის მცდელობა, რომ ნაცვლად იმისა, რომ მოხდეს დემოკრატიის კონსოლიდაცია ხდება ძალაუფლების კონსოლიდაცია. ეს ყველაფერი ხდება ოლიგარქიული წყობილების დამკვიდრების სტილში“, - აცხადებს მელია.