სტრასბურგში მიღებულ რეზოულიციას ვიცე-პრემიერი კახი კალაძე ეხმაურება. მისი თქმით, ყოფილი მაღალჩინოსნების საგამოძიებო პროცესი, რომელზეც რეზოლუციაშია საუბარი, გამჭირვალედ მიმდინარეობს.

„ჩვენ ევროპელ მეგობრებს აქვთ საშუალება ჩამობრძანდნენ და დააკვირდნენ, თუ როგორ მიმდინარეობს ყოფილი მაღალჩინოსნების სასამართლო პროცესები. ყოფილ მაღალჩინოსნებს ჩვენი ქვეყნის და ჩვენი ხალხის წინაშე კონკრეტული დანაშაულები აქვთ ჩადენილი. ის კითხვები, რომელიც არის საზოგადოებაში ამ საქმეებთან დაკავშირებით, ამაზე პასუხი უნდა იყოს გაცემული“, - განაცხადა კალაძემ.

ევროსაბჭოს საპარლამენტო ასამბლეამ საქართველოს შესახებ ანგარიში მიიღო. დოკუმენტში პოლიტიკური დევნის, ბაჩო ახალაიასთვის აღკვეთის ღონისძიების შეცვლის, ასევე, მიხეილ სააკაშვილის სამართლებრივი დევნის და მისი ქონების დაყადაღების საკითხი მოხვდა. ანგარიშში არ შევიდა "ერთიანი ნაციონალური მოძრაობის" ის შესწორება, რომელიც ბიძინა ივანიშვილის ხელისუფლებაში ჩარევას ეხებოდა.