„დემოკრატიული განვითარების ეროვნული ცენტრი“ საქართველოს ხელისუფლებასთან დაკავშირებით განცხადებას ავრცელებს და მთავრობას რიტორიკას უწუნებს. განცხადებაში „თავისუფალ ზონასთან“ დაკავშირებულ ინციდენტზეა საუბარი:

„შემაშფოთებელია შედეგი რომელიც მთავრობის რიტორიკამ მოიტანა. შესაბამისად არასამთავრობო ორგანიზაციის „თავისუფალი ზონა“ წევრების მიმართ განხორციელებული დანაშაულისთვის პასუხისმგებლობაც ხელისუფლებას ეკისრება.

ყოვლად გაუმართლებლად მივიჩნევთ მმართველი პოლიტიკური გუნდის მიერ აგრესიის და შუღლის გაღვივებას. მაშინ როდესაც შინაგან საქმეთა მინისტრმა დანაშაული თავიდან უნდა ააცილოს საზოგადოებას, მთავრობამ პირდაპირ დასდო ბრალი „თავისუფალ ზონას“ სამომავლოდ უკანონო ქმედებების დაგეგმვაში, ხოლო სახეზე ამ ორგანიზაციის მიმართ განხორციელებული ჯგუფური დანაშაული გვაქვს. დაუშვებელია ხელისუფლება აგრესიას აღვივებდეს საზოგადოებაში, თავად არღვევდეს უდანაშაულობის პრეზუმფციას და ხელს უწყობდეს კრიმინალური დაჯგუფებების შექმნას.

მოვუწოდებთ არასამთავრობო ორგანიზაციებს გაერთიანებისკენ, რათა ვიხსნათ არასამთავრობო სექტორი და მედია ძალადობისგან და აგრესიისგან რომელსაც ხელისუფლება ნერგავს.

გვინდა გავაფრთხილოთ საქართველოს მთავრობა და მმართველი პოლიტიკური ძალა, რომ მსგავსი ფაქტებისთვის პასუხისმგებლობა მას დაეკისრება, ხოლო ჩვენ როგორც განუყოფელი ნაწილი სამოქალაქო საზოგადოებისა, ვერ დავუცდით ვინ იქნება შემდეგი, აგრესიის გაღვივებისა და კრიმინალური დაჯგუფებების წაქეზებისთვის კი გაგცემთ უმკაცრეს პასუხს“, - ნათქვამია განცხადებაში.