„ნაციონალური მოძრაობა“ „თავისუფალი ზონის“ ოფისში მომხდარ ინციდენტს პროვოკაციად აფასებს. ამის შესახებ პარტიის მიერ გავრცელებულ განცხადებაშია ნათქვამი.

მათი თქმით, „თავისუფალ ზონაზე“ თავდასხმით ივანიშვილი ანტიდასავლურ ექსტრემისტულ ძალებთან ერთად ღია ძალადობრივ პროვოკაციებსაც აწყობს.

„30 სექტემბრის ღამეს არასამთავრობო ორგანიზაცია „თავისუფალი ზონის“ ოფისთან შინაგან საქმეთა სამინისტროს მიერ ღიად პრორუსული ექსტრემისტული დაჯგუფებებისა და ანტიეროვნული გაზეთის „ასავალ-დასავალის“ გამოყენებით მოეწყო ძალადობრივი პროვოკაცია.

ღარიბაშვილისა და ჭიკაიძის მიერ ორგანიზებული აგრესიული ჯგუფები მსგავს პროვოკაციებს ერთიანი ნაციონალური მოძრაობის ცენტრალურ ოფისთან ადრეც რეგულარულად აწყობდნენ. დღეს სამიზნე „თავისუფალი ზონაა“ - ორგანიზაცია, რომელიც ამჟამინდელი მთავრობის რუსეთთან მაამებლური პოლიტიკის მკვეთრი კრიტიკით გამოირჩევა. საზოგადოება კარგად ხედავს, რომ ოლიგარქ ივანიშვილისთვის მიუღებელია ნებისმიერი კრიტიკა: იქნება ეს საპარლამენტო, კონსტრუქციული კრიტიკა; არასამთავრობო ორგანიზაციების მიერ განხორციელებული საზოგადოებრივი მონიტორინგი თუ თავისუფალი მედიის მიერ აქტუალური თემების გაშუქება. 2014 წლის ივნისში, ღარიბაშვილმა საქართველოს წამყვან ავტორიტეტულ არასამთავრობო ორგანიზაციებს საბჭოთა პერიოდისთვის დამახასიათებელი ბრალდება „ძირგამომთხრელი საქმიანობა“ წაუყენა.

ივანიშვილის რეჟიმი დაკავებულია არა მხოლოდ სახელმწიფო ინსტიტუტების დასუსტებითა და ძირის გამოთხრით არამედ დემოკრატიული წეს-წყობილების ნგრევითაც რაც რეალურ საფრთხეს უქმნის საქართველოს ევროპულ მომავალს და მხოლოდ კრემლის წისქვილზე ასხამს წყალს. ზემოთთქმულიდან გამომდინარე, მოვუწოდებთ საქართველოს ყველა დემოკრატიული ფასეულობების მქონე პროდასავლურ ძალებს წინ აღუდგნენ ივანიშვილის რეჟიმის მიერ საქართველოს უფსკრულისკენ წაყვანას“, - ნათქვამია განცხადებაში.