ხალხს აქვს გაურკვევლობის და ბუნდოვანების განცდა , იმასთან დაკავშირებით, თუ საით მიდის ქვეყანა- განაცხადა „რუსთავი 2“-ის გადაცემა „არჩევანში“ ახალი მემარჯვენეეების ლიდერმა ფიქრია ჩიხრაძემ.

„ქვეყანა უნდა მიდიოდეს წინ , რაც ცუდი იყო, ის უნდა შეიცვალოს, თუ რაიმე კარგი ხდებოდა წინა ხელისუფლების პირობებში, არც ამის აღიარების უნდა შეგვრცხვეს და უნდა გაგრძელდეს.“

ფიქრია ჩიხრაძემ მიმდინარე რეფორმებზე და საგარეო ურთიერთობებზეც ისაუბრა, მისი განცხადებით, ქვეყანაში რეფორმებს სისტემური ხასიათი არ აქვს, განათლების სფეროში მიმდინარე რეფორმა კი პედაგოგებისთვის საფრთხის შემცველია.

„საგარეო ურთიერთობებში მიღწეული წარმატება არ არის ჩვენი დამსახურება, ეს ქართველი ხალხის ისტორიის და უკრაინაში მიმდინარე მოვლენების დამსახურება, ასევე პუტინის „დამსახურება“ “ - განაცხადა ჩიხრაძემ

ფიქრია ჩიხრაძის თქმით, არასაპარლამენტო ოპოზიციასაც უნდა მიეცეს საშუალება, რომ ხელისუფლებასთან და საპარლამენტო ოპოზიციასთან ერთად დებატებში მონაწილეობა მიიღოს, „ საპარლამენტო ძალების წარმოდგენა დებატებში ამ სახით, რომ „შენ ჩემზე ცუდი ხარ“ და „შენ ჩემზე უფრო ცუდი იყავი“ ეს არ მოიტანს პოზიტივს, ეს ვერ არის მომავლისაკენ გზა, მუდმივი ლაპარაკი იმაზე, ვინ ვისზე უარესია, არ მოიტანს შედეგს“

ფიქრია ჩიხრაძის განცხადებით, ჟურნალისტების მიმართ კრიტიკა ორგანიზებული და ორკესტრირებული სახისაა: „მე არ ვუერთდები იმ კრიტიკას, რომელსაც იღებთ ამ ბოლო დროს ჟურნალისტები და რომელიც ორკესტრირებულია ერთგვარად, ეს შესამჩნევია“-განაცხადა ახალი მემარჯვენეების ლიდერმა.