საქართველო კლიმაქს.

ქართველებო არ იოცნებოთ. იმოძრავეთ.

მაგრამ როცა საზოგადოება ასეა დაკომპლექსებული, (გარეთ მხდალი, შინ ძლიერი) ვერც მოძრაობა, ვერც მედიცინა და ვერც ექზორციზმი და ვერც 40 წელი უდაბნოში ხეტიალი და ვერც პოეზია, ვერც ომი და ვერც მშვიდობა და ვერც როკ'ენ'როლი, ვეღარაფერს იზამს.

ღვთისმშობლის წილხვედრნი ვართ თუ სტალინის? ჩამოვყალიბდეთ. ორივეს წილხვედრობა, ერთად არ გამოდის.

ეს კი სტატისტიკის მოყვარულებს - რამდენადაც ვიცი, საერთაშორისო სტატისტიკით რუსეთი პირველ ადგილზეა: ჰეროინის მოხმარებით, ალკოჰოლის პათოლოგიური მოხმარებით, მეძავების რაოდენობით, ბავშვთა სიკვდილიანობით და ბავშვებზე ძალადობით, პედოფილიითა და ბავშვთა პორნოგრაფიით, ოჯახების ხშირი ნგრევითა და მეუღლეთა ღალატით, კორუფციით. მოსკოვის წითელ მოედანზე დღემდე უწევთ ლენინის გვამი და მის სანახავად, ყოველთვის რიგი დგას. ეს ყველაფერი ჩვენი „ერთმორწმუნე“ მეზობელი სახელმწიფოს ტრადიციაა.

ღმერთი ერთია, ჩვენ ყველანი, მთელი კაცობრიობა ერთმორწმუნეები ვართ და რუსეთის „ერთმორწმუნეობა“ აქ არაფერ შუაშია.

დღეს არცოდნა აღარ არის არცოდვა. დღეს არცოდნა არჩევანია.

ადრე კეთილშობილება, ინტელექტი, განათლებულობა, ზიზღს იწვევდა. ახლა ის სახიფათოა. სახიფათოა ილუზიებით მართულ საზოგადოებაში.

ილუზია კი იზოლაციაა.

ინგლისური ენის მასწავლებლების პროგრამის შეჩერება - იზოლაციაა. ამერიკის შეერთებული შტატების და ევროპის, მოქალაქეებისთვის ვიზების გართულება - იზოლაციაა. სი ენ ენ - სა და სხვა გლობალურ მედიაში საქართველოს შესახებ რეკლამის კამპანიის შეწყვეტა - იზოლაციაა. ტურიზმის, როგორც პრიორიტეტის გაქრობა - იზოლაციაა. დასავლეთის დემოკრატიულ ქვეყნებთან დიალოგის მკვეთრი შეკვეცა და მისი უმნიშვნელო პირობითობამდე დაყვანა - იზოლაციაა. უცხოეთის მნიშვნელოვან ვიზიტებზე გასამგზავრებლად, პრემიერ-მინისტრისა და პრეზიდენტის მიერ ერთმანეთის დამცირება - იზოლაციაა. დღე და ღამე ტელევიზორისა და კომპიუტერის ეკრანის ყურება - იზოლაციაა.

იზოლაცია შენივე თავისგან. შენი თავისუფლებისგან.

დრო გადის.

დ. 30 სექტემბერი 2014