ევროსაბჭოს ანგარიშში საქართველოს პრეზიდენტსა და პრემიერს შორის დაძაბული ურთიერთობაც მოხვდა. დოკუმენტში საუბარია საქართველოს პრემიერ-მინისტრსა და პრეზიდენტს შორის დაძაბულობის ზრდაზე, რომლებიც ვერ თანხმდებოდნენ, თუ ვინ მოაწერდა ხელს ევროკავშირთან ასოცირების შეთანხმებას.

დოკუმენტი, სახელწოდებით "დემოკრატიული ინსტიტუციების ფუნქციონირება", ბოლო ერთი წლის განმავლობაში საქართველოში განვითარებულ მოვლენებს ეხება.

ამავე დოკუმენტში საუბარია წინა ხელისუფლების წარმომადგენელთა სისხლისსამართლებრივ დევნაზე. ავტორები შეშფოთებას გამოთქვამენ იმ გადაწყვეტილებაზე, რომლის თანახმადაც ბაჩო ახალაია საქმის სასამართლოში მიმდინარეობისას 9 თვეზე მეტი გააჩერეს ციხეში, რაც კანონის მოთხოვნებს ეწინააღმდეგება.

"ჩვენ უკვე გამოვხატეთ ზოგადი დამოკიდებულება საქართველოში წინასწარი პატიმრობის გადაჭარბებულად გამოყენებასთან დაკავშირებით და უკიდურესად შეშფოთებულები ვართ იმ გადაწყვეტილებით, რითაც ბაჩო ახალაია საქმის სასამართლოში მიმდინარეობისას ცხრა თვეზე მეტი გააჩერეს ციხეში, რაც კანონის მოთხოვნებს ეწინააღმდეგება. მოვუწოდებთ საქართველოს ხელისუფლებას, შეცვალს ბაჩო ახალაიას წინასწარი პატიმრობა არასაპატიმრო, გამაფრთხილებელი ზომით, რაც შესაძლებელია სასამართლოსა და პროკურატურისთვის", - ნათქვამი ანგარიშის სამუშაო ვერსიაში.

ევროსაბჭოს საპარლამენტო ასამბლეის მონიტორინგის კომიტეტის მიერ მომზადებული რეზოლუციაში შესატანი ცვლილებების პარაგრაფში ასევე საუბარია მიხეილ სააკაშვილის წინააღმდეგ განხორციელებული სამართლებრივი დევნისას საერთაშორისო სამართლის პრინციპების დაცვის აუცილებლობაზე.

ევროსაბჭოს საპარლამენტო ასამბლეა საქართველოს შესახებ მონიტორინგის კომიტეტის ანგარიშს ხვალ განიხილავს.