დასავლეთ საქართველოში ნალექის რაოდენობამ იკლო, ამ დროისათვის სიტუაცია შედარებით სტაბილურია. დღეს გზის აღდგენითი სამუშაოები განახლდება.

სტიქიის სალიკვიდაციო სამუშაოების პარალელურად, მიმდინარეობს ზარალის დათვლაც. ქედასა და გურიის მიმართულებით მძიმე ტექნიკა უკვე მობილიზებულია.

ბათუმი-ახალციხის ავტომაგისტრალზე დილიდან გაწმენდითი სამუშაოები განახლდა. აღნიშნულ მონაკვეთზე, გუშინ გვიან ღამით მეწყერის ჩამოწოლის გამო, საავტომობილო მოძრაობა სამი საათით იყო ჩაკეტილი. სოფელ დოლოგანში ჩამოწოლილმა მეწყერმა გზა მთლიანად ჩაკეტა. მძიმე ტექნიკის სამ საათიანი მუშაობის შემდეგ შესაძლებელი გახდა გზის ცალმხრივად გახსნა. გეოლოგები მეწყერის განმეორებას არ გამორიცხავენ.

ქედას გარდა, უამინდობის შედეგად აჭარაში მეწყერი კიდევ რამდენიმე ადგილას ჩამოწვა, მათ შორის ქობულეთის რამდენიმე სოფელში, რის გამოც სოფელ აჭყვისთავის 50-მდე სოფელი ამდრომდე შემოვლითი გზით სარგებლობს.

მეწყერული პროცესები განვითარდა სოფელ სკურაშიც, საიდანაც სამი ოჯახია ევაკუირებული.

ქობულეთში ქალაქის ცენტრი და ბაზრის მიმდებარე ტერიტორია დაიტბორა. სტიქიამ ხელვაჩაურის მუნიციპალიტეტსაც მიაყენა ზიანი, ორ სოფელში მცირე მეწყერი ჩამოწვა. სადაც შესაძლოა 12 ოჯახის გასახლება გახდეს საჭირო. აღნიშნულ საკითხს სამთავრობო კომისია განიხილავს. მსგავს მდგომარეობაში კიდევ რვა ოჯახია, საბოლოო გადაწყვეტილება გეოლოგების დასკვნის შემდეგ იქნება მიღებული. ქობულეთის რაიონში სულ 5 სოფელია დატბორილი.

ოზურგეთის რაიონის ერთერთ სოფელში სტიქიამ 50-მდე ოჯახი მოსავლის გარეშე დატოვა. ჯუმათში ადიდებულმა სუფსამ ყანები დატბორა და თხილის პლანტაციები გაანადგურა. მოსახლეობა ხელისუფლებისგან დახმარებას და მდინარის კალაპოტის გასწორებას ითხოვს.