უამინდობასთან დაკავშირებით აჭარის მთავრობა მობილიზებულია

პოლიტიკა - 19:55, 29 Sep, 2014

1499

დღეს საღამოს საგანგებო შტაბი ისევ შეიკრიბა და დღის განმავლობაში განვითარებული მოვლენები განიხილა. სხდომას აჭარის მთავრობის თავმჯდომარის მოვალეობის შემსრულებელი ნუგზარ სურმანიძე უძღვებოდა. სხდომას აჭარის მთავრობის აპარატის უფროსი რუსლან ქორიძე, მერიის სამსახურების, საავტომობილო გზებისა და სამელიორაციო სისტემების მართვის დეპარტამენტისა და გარემოს დაცვის სამმართველოს წარმომადგენლები ესწრებოდნენ.

აჭარის მთავრობის ადმინისტრაციულ ორგანოებთან ურთიერთობის დეპარტამენტის ხელმძღვანელის კახა შაშიკაძის თქმით, „სხდომაზე განხილულ იქნა მუნიციპალიტეტებში სტიქიის მიერ მიყენებული ზიანი. ბოლო სტიქიის დროს ყველაზე მეტად დაზარალდა ქობულეთის მუნიციპალიტეტი. პრობლემები შეექმნა საცხოვრებელ სახლებს და ადგილობრივი მნიშვნელობის გზებს ხელვაჩაურის მუნიციპალიტეტშიც. საგზაო დეპარტამენტი მუშაობს გზების რეაბილიტაციაზე. ქედის მუნიციპალიტეტში მდინარე ზანა ადიდდა და დატბორა მოსახლეობის სახნავ-სათესი სავარგულები. ორ ოჯახს ქარმა სახურავი დაუზიანა. რაც შეეხება ბათუმს, წინასწარ მობილიზებული იყო ყველა სამსახური და არსებითი ზიანი ქალაქს არ მიდგომია. ამ ეტაპზე ხდება ყველა პრობლემის იდენტიფიცირება, რომელიც მთავრობის შესაბამის დეპარტამენტში იყრის თავს. ამის შემდეგ კომისია ყველა ამ ობიექტზე გავა ზარალის შესაფასებლად.“

„გზები უკვე 15 მიმართულებით გახსნილია, თუმცა ამდენივე დაზიანებულია. ჩვენ დახმარება აღგვითქვა ქობულეთის გამგეობამ, ასევე კერძო კომპანიებმა და ვფიქრობთ ორ დღეში ძირითადი მიმართულებები ქობულეთის რაიონში გაიწმინდება. ხელვაჩაურში ყველა მიმართულებით მოძრაობა აღდგენილია. ჩვენ გავაკეთეთ დროებითი ხიდი და შედეგად, სიმონეთის მიმართულებით მოძრაობა ნებისმიერ სატრანსპორტო საშუალებას შეუძლია,“ - აღნიშნა საავტომობილო გზებისა და სამელიორაციო სისტემების მართვის დეპარტამენტის ხელმძღვანელმა გიორგი რომანაძემ.