თბილისისა და ქუთაისის მერები სამუშაო ვიზიტით გერმანიაში გაემგზავრნენ

პოლიტიკა - 18:11, 28 Sep, 2014

1548

კონფერენცია, რომელშიც თბილისისა და ქუთაისის მერები მიიღებენ მონაწილეობას, გერმანიის რეკონსტრუქციისა და განვითარების ბანკის ორგანიზებით იმართება და ის სამხრეთ კავკასიაში მდგრადი უბანული განვითარების საკითხებს მიეძღვნება.

კონფერენციაზე ურბანულ დაგეგმარებასა და ქალაქის მენეჯმენტის რეალობის შეცვლის საკითხებზე, სამხრეთ კავკასიაში ურბანული განვითარების მხრივ არსებულ პროგრესზე, წყლის რესურსების, სანიტარიისა და ნარჩენების მართვის საკითხებზე იმსჯელებენ.

„კონფერენცია სპეციალურად კავკასიაში მუნიციპალური მართვისა და ამ მიმართულებით სერვისების გაუმჯობესებას ეხება. ყურადღებას განსაკუთრებით გავამახვილებთ ინფრასტრუქტურის მოწერიგებაზე, რადგან ამ მიმართულებით ევროპული მიდგომებისა და სტანდარტების დანერგვა ჩვენთვის სასიცოცხლოდ აუცილებელია“, - განაცხადა დავით ნარმანიამ.

ქუთაისის მერის, შოთა მურღულიას განცხადებით, მნიშვნელოვანია, რომ საქართველომ ურბანული განვითარების კუთხით გერმანიის გამოცდილება გაიზიაროს. „ის კარგი გამოცდილება, რომელიც ევროპაში მუნიციპალური სერვისების გაუმჯობესების მიმართულებით არსებობს, უნდა გადმოვიტანოთ და ჩვენს ქალაქებსა და მუნიციპალიტეტებს მოვახმაროთ. ეს სწორედ ის ძირითადი სერვისებია, რომლითაც ყოველდღიურად სარგებლობს ჩვენი მოსახლეობა. შესაბამისად, მაქსიმალურად ვეცდებით, დავამყაროთ რაც შეიძლება კარგი კონტაქტები და მოვიპოვოთ ის დაფინანსება, რომელიც ამ სერვისების დანერგვისთვის არის საჭირო“, - განაცხადა შოთა მურღულიამ.

კონფერენცია სამი დღეს გაგრძელდება და მას საქართველოს, სომხეთისა და აზერბაიჯანის დელეგაციები დაესწრებიან.