,,აფხაზთა კრებით“ მნიშვნელოვან საზოგადოებრივ-პოლიტიკურ მოძრაობას ეყრება საფუძველი

პოლიტიკა - 17:44, 27 Sep, 2014

2084

სოხუმის დაცემის დღეს 30-ზე მეტი არასამათავრობო ორგანიზაციის, აფხაზეთიდან დევნილი მოქალაქეების, პოლიტიკური პარტიებისა და საზოგადოებრივი ჯგუფების ხელშეწყობით ჭადრაკის სასახლეში ,,აფხაზთა კრება“ ჩატარდა, რომელიც, ორგანიზატორების განცხადებით, არის ახალი მოძრაობის დასაწყისი. ,,აფხაზთა კრებას“ 500-მდე დელეგატი ესწრებოდა. ,,აფხაზთა კრებას“ მხარდაჭერას უცხადებს ,,ეროვნულ-დემოკრატიული“ პარტია.

ბაჩუკი ქარდავამ ჟურნალისტებთან საუბარში აღნიშნა, რომ ,,აფხაზთა კრების“ მიზანი არის ჩვენი ტერიტორიული მთლიანობის საკითხის კიდევ უფრო გააქტიურება. მისი თქმით, აფხაზთა კრების დაფუძნება და ამ მოძრაობის დაწყება არ არის ერთ კონკრეტული მიმართულებაზე ორიენტირებული ღონისძიება ან ვიღაცის საწინააღმდეგოდ შექმნილი.

,,ზუსტად 21 წლის შემდეგ აფხაზთა კრების ჩატარება ნიშნავს იმას, რომ რამდენი წელიც არ უნდა გავიდეს ჩვენ არ შევეგუებით აფხაზეთის დაკარგვას, აქ არიან შეკრებილი აფხაზეთიდან დევნილი ადამიანები, აფხაზური არასამთავრობო ორგანიზაციები, ამ მოძრაობის მიზანი არის ჩვენი ტერიტორიული მთლიანობის საკითხის კიდევ უფრო გააქტიურება და აქ გამოვყოფ ორ მიმართულებას - ერთი, საგარეო პოლიტიკის კუთხით ხელისუფლების წინაშე საკითხის დაყენება, რომ ალტერნატივა არ აქვს ქვეყნის დასავლურ კურსს, ნატოსა და ევროპულ სტრუქტურებში გაწვევრიანებას და მეორე, ეს არის თვითორგანიზება, ანუ აფხაზური სტრუქტურები უნდა იყოს ორიენტირებული არა მხოლოდ სოციალურ პრობლემატიკაზე, არამედ ამ დევნილების საკუთარ სახლში დაბრუნება უნდა გახდეს მთავარი პრიორიტეტი აფხაზეთის უმაღლესი საბჭოსთვის. ანუ საჭიროა უფრო მეტი პოლიტიკური აქტივობა, რომელიც შეუძლია განახორციელოს ისეთმა წარმომადგენლობითმა ორგანომ, რომელსაც აქვს უნარი განახლების“, - აცხადებს ქარდავა.

ედპ-ს ლიდერის თქმით, ის ადამიანები, ვინც დაიბადნენ 21 წლის წინ სოხუმის დაცემის დღეს, დღეს უკვე არიან იმ ასაკში, რომ აირჩიონ ან იყვნენ არჩეულნი სხვადასხვა არჩევით ორგანოებში.

,,მინიმუმ ეს არგუმენტია საკმარისი იმისა, რომ რაღაც ფორმით მოხდეს განახლება ან ხელახალი არჩევა აფხაზეთის წარმომადგენლობითი ოგანოსი. დარწმუნებული ვარ, ეს მოხერხდება და იქნება უფრო ქმედითი, ვიდრე ეს დღე არის. უმაღლესი საბჭოს წარმომადგენლები აქაც ესწრებიან დღევანდელ ,,აფხაზთა კრებას“, ძალიან ბევრთან, რომელიც აქ არი არის, მაქვს კარგი ურთიერთობა და ვფიქრობ, ისინიც უნდა იყვნენ მომხრე ასეთი განახლები და გაქტიურების“, - დასძინა ქარდავამ.