საქართველოს პრემიერმინისტრმა ირაკლი ღარიბაშვილმა გაეროს გენერალური ასამბლეის 69-ე სესიაზე სიტყვით გამოსვლისას აფხაზეთისა და „სამხრეთ ოსეთის“ თემაზე ისაუბრა, რუსეთს კი 2008 წელს აღებული ვალდებულებების შესრულებისკენ მოუწოდა:

„ყოველ წელს საერთაშორისო საზოგადოება სულ უფრო მეტად უჭერს მხარს ლტოლვილთა უფლებას, დაბრუნდნენ შინ, რაც გამოიხატება გაეროს გენერალური ასამბლეის რეზოლუციის მიღებით „აფხაზეთიდან და ცხინვალის რეგიონიდან ე.წ. სამხრეთ ოსეთიდან იძულებით გადაადგილებულ პირთა და ლტოლვილთა სტატუსის შესახებ“.

არსებითი მნიშვნელობა აქვს იმას, რომ გენერალურმა ასამბლეამ თავის დღის წესრიგში დატოვოს ეს ჰუმანიტარული საკითხი და კვლავაც მტკიცედ და დამაჯერებლად დაუჭიროს მხარი იძულებით გადაადგილებულ პირთა უფლებებს.

ნება მომეცით მივმართო ჩვენს დებსა და ძმებს აფხაზეთსა და სამხრეთ ოსეთში: „ძვირფასო დებო და ძმებო ვოცნებობ იმ დღეზე, როცა ყველანი ერთად ვიცხოვრბეთ და ჩვენს შორის მშვიდობა და კეთილდღეობა დაისადგურებს“.

ჩვენ განუხრელად მივყვებით შერიგებისა და საქართველოს ტერიტორიული მთლიანობისა და სუვერენიტეტის სრული აღდგენის გზას.

ჩვენ უნდა ვიმუშაოთ და გამოვნახოთ გზები, რათა თქვენც გახდეთ ამ წარმატების თანაზიარი, მათ შორის იმ სარგებლის, რომელსაც ასოცირების ხელშეკრულება მოიტანს.

ამასთან, მოვუწოდებ რუსეთს შეასრულოს 2008 წელს ცეცხლის შეწყვეტის შესახებ საერთაშორისო ხელშეკრულებით ნაკისრი ვალდებულებები და შემოგვიერთდეს ჩვენი ოცნების - მშვიდობის, კეთილდღეობისა და შერიგების - ხორცშესხმაში.

ჩვენი ისტორია და ღირებულებები ჩვენი სიძლიერეა, რომლებიც, ჩვენს სტრატეგიულ მდებარეობასთა ერთად, გვაძლევს იმის საშუალებას, რომ უნიკალური რამ შევთავაზოთ მსოფლიოს და ვიყოთ მშვიდობისა და უსაფრთხოების მამოძრავებელი ძალა“, - განაცხადა ირაკლი ღარიბაშვილმა.