ნატო-ს აღმოსავლეთით გაფართოება შეცდომა და პროვოკაცია - ეს განცხადება სერგეი ლავროვმა გაერო-ს გენერალური ასამბლეის ფარგლებში გამართულ პრესკონფერენციაზე გააკეთა.

ლავროვი აცხადებს, რომ უკრაინის კრიზისის წარმოშობის მიზეზი ევროპული უსაფრთხოების გლობალური კრიზისი გახდა, ხოლო ნატოს გაფართოებას დასავლეთის უპასუხისმგებლო პოლიტიკას უკავშირებს.

სერგეი ლავროვი ასევე შეეხო პოლონეთისა და საფრანგეთის ინიციატივას, გაერო-ს უშიშროების საბჭოში რუსეთისათვის ვეტოს უფლების ჩამორთმევის თაობაზე და აღნიშნა, რომ მოსკოვი ვეტოს გამოყენების წესის შეცვლას არ დათანხმდება:

„არ შეიძლება ვებრძოლოთ სიმპტომებს იმ საკითხებთან მიმართებაში, რომლებიც ვროპულ კონტინენტზე ჩნდება, მათ შორის უკრაინის კრიზისს. ევროპული უსაფრთხოების სისტემის კრიზისი არა უკრაინის მოვლენების გამო წარმოიშვა, არამედ პირიქით, უკრაინის კრიზისი გახდა იმ ძირეული წინააღმდეგობების შედეგი, რომლებიც ევროატლანტიკაში დაგროვდა ცივი ომის დასრულების შემდეგ.

გრძელდებოდა ნატო-ს გაფართოება აღმსოავლეთის მიმართულებით და იქ სამხედრო ინფრასტრუქტურის განლაგება. ნატო-ს გაფართოება შეცდომა და პროვოკაციაა, ეს უპასუხისმგებლო პოლიტიკაა, რომელიც ევროპაში ერთიანი უსაფრთხოების სისტემის ჩამოყალიბების შესახებ ვალდებულებას არღვევს“, - განაცხადა სერგეი ლავროვმა.