თურქულ მხარესთან სკოლებში ქართული ენის სწავლებასთან დაკავშირებულ დეტალებზე საუბარი ჯერ არ დაწყებულა. ამის შესახებ განათლების მინისტრმა თამარ სანიკიძემ განაცხადა.

მისი თქმით, შესაბამისი სტანდარტის სახელმძღვანელო საქართველოში მომზადდა და თურქული მხარისგან დასტური სწორედ მათი შესწავლის შემდეგ მიიღეს.

მინისტრის განმარტებით, თუ პროცესის დროს ქართული მხარის ჩართვის საჭიროება იქნება, ისინი მზად არიან თანამშრომლობისთვის.

„ქართული დიასპორა ძალისხმევას არ იშურებდა, რომ ეს საბოლოოდ მომხდარიყო. აღნიშნული გადაწყვეტილება უდიდესი დახმარება იქნება ეთნიკური ქართველებისთვის, რადგან მათ ქართული ენის შესწავლაზე რეალური ხელმისაწვდომობა ექნებათ. ჩვენი ჩართულობა ძირითადად საგანმანათლებლო რესურსების, საგნობრივი სტანდარტის, პროგრამის მომზადებაში გამოიხატებოდა. საბოლოო ჯამში ქართულმა დიასპორამ მიაღწია იმ წარმატებას, რომლის ფარგლებშიც თურქეთში ეთნიკური ქართველები და საერთოდ, ქართული ენის სწავლის მსურველები, მის შესწავლას საჯარო სკოლებში შეძლებენ. პროგარამაში არის ზოგადი ჩანაწერი, რომელიც გვეუბნება, რომ კლასში სადაც 10 ან მეტი მსურველი იქნება, მათ ქართული ენის სწავლის საშუალება ექნებათ“ - განაცხადა სანიკიძემ.