„ნაციონალური მოძრაობა“ მთავრობას კრიმინალური ავტორიტეტების მფარველობაში ადანაშაულებს. უმცირესობის წევრმა, გივი თარგამაძემ ჟურნალისტებს კონკრეტული ფაქტები და ფოტომასალა გააცნო. მისი მტკიცებით კანონიერი ქურდი ლექსო ლოგუა (გალელი) 2014 წლის 12 ივნისს დააკავეს ქ. მინსკში და გაუკეთეს დეპორტაცია საქართველოში.

„დეპორტაციის შემდეგ, ლექსო ლოგუა, რომელიც ქურდად ზემოაღნიშნულმა გელა ქარდავამ „აკურთხა“, აგვისტოს თვეში საქართველოს საპატიმროს ნაცვლად, აღმოჩნდა თურქეთში გამართულ კრიმინალური ავტორიტეტების შეკრებაზე, სადაც სენაკში მშვიდად მაცხოვრებელი კანონიერი ქურდი ცანციკას სიძე მახარე გვარამია (მაცე) ესწრებოდა. აღსანიშნავია, რომ ლექსო გალელი 2012 წლის შემდეგ მეორედ შემოვიდა საქართველოში და მეორედ აღმოჩნდა საპატიმროს ნაცვლად თურქეთში (პირველად ეს 2013 წლის 13-14 აგვისტოს მოხდა).

როგორც არაერთხელ ავღნიშნეთ ასეთი მოვლენები შეუძლებელი იქნებოდა დღევანდელი მთავრობის ღია, თუ ფარული დახმარებისა და მფარველობის გარეშე, რასაც ადასტურებს შემდეგი შემთხვევა. კრიმინალური ავტორიტეტი ავთანდილ ამირანის-ძე ლუტიძე (23.11.1979, მეტსახელად ლუტია ქუთაისელი) თურქეთიდან შემოვიდა საქართველოში სარფის მხრიდან 2014 წლის 5 სექტებრის 22 საათი 36 წუთზე და 2014 წლის 6 სექტემბერს 21 საათსა 29 წუთზე დატოვა ქვეყანა წითელი ხიდით და გადავიდა აზერბაიჯანში. ავთანდილ ლუტიძე გახლავთ ლავას-ოღლის კრიმინალური დაჯგუფების ერთ-ერთი გავლენიანი პირი. ჩვენი ინფორმაციით მას სარფში დახვდა და წითელ ხიდამდე მიაცილა საქართველოს შსს სახელმწიფო უსაფრთხოების სააგენტოს (სუს) ხელმძღვანელი მალხაზ ჩიკვილაძე“, - აცხადებს თარგამაძე.