,,აფხაზთა კრების“ მხარდამჭერი ახალგაზრდები ირაკლი შიხიაშვილს ამხელენ

პოლიტიკა - 11:15, 26 Sep, 2014

2249

26 სექტემბერს ,,აფხაზთა კრების“ სარგანიზაციო ჯგუფი, საზოგადოებრივი ორგანიზაციები და პოლიტიკოსები გვიან საღამოს აფხაზეთში დაღუპული გმირების მემორიალთან სოხუმის დაცემის დღესთან დაკავშირებულ აქციას მართავენ. როგორც აქციის ორგანიზატორები აცხადებენ, მსგავსი ტიპის აქცია საქართველოში არ ჩატარებულა, კერძოდ მონაწილეები ზუსტად იმ დროისთვის, როცა 26 სექტემბერს სოხუმზე შეტევა დაიწყო, ხმამაღლა წაიკითხავენ იმ დაღუპული მეომრების სახელებსა და გვარებს, რომლებიც საქართველოს ტერიტორიული მთლიანობისათვის ბრძოლას შეეწირნენ.

აქციის მონაწილე ახალგაზრდებმა ვეტერანთა დეპარტამენტის თავმჯდომარე ირაკლი შიხიაშვილისგან ითხოვეს დაღუპული მებრძოლების სრული სიის გადაცემა, რაზეც შიხიაშვილმა უარი განაცხადა.

რა მიზეზით არ გასცა ირაკლი შიხიაშვილმა აფხაზეთში დაღუპული მეომრების სია, ამ დრომდე უცნობია.

,,ნიუპოსტი“ კომენტარისთვის ,,აფხაზთა კრების“ მიერ დაგეგმილი აქციის მონაწილეებს დაუკავშირდა. როგორც ისინი აცხადებენ, რამდენიმე დღე დადიოდნენ სიის მისაღებად, თუმცა უშედეგოდ. ,,დღეს გაირკვა, რომ შიხიაშვილმა უარი განგვიცხადა დაღუპული მებრძოლების სიის გადმოცემაზე. რა თქმა უნდა სია ჩვენ გვაქვს, ვიწვალეთ და რამდენიმე ათასი დაღუპულის გვარ-სახელი მოვიპოვეთ და აქციაც შედგება, მაგრამ ჩვენთვის გაუგებარია მსგავსი დამოკიდებულება, ეს არის აფხაზეთში დაღუპული გმირების ხსოვნის უპატივცემულობა“, - აცხადებენ ახალგაზრდები.