საქართველოს პრემიერ-მინისტრი „Foreign Policy“-ში გამოქვეყნებულ ინფორმაციას ეხმაურება.

ირაკლი ღარიბაშვილის თქმით, საქართველოს ტერიტორიაზე სირიელი ამბოხებულების საწვრთნელი ბაზის შექმნა არ იგეგემება.

მისი განმარტებით, საქართველოს მონაწილეობა ანტიტერორისტულ კოალიციაში ჰუმანიტარული დახმარების სახით განისაზღვრება.

„ეს არის მცდარი ინფორმაცია. ჩვენთან არანაირი ტრენინგ-ცენტრის შექმნა არ იგეგმება. მინდა მოგიწოდოთ ჟურნალისტებს, რომ უფრო მეტი პასუხისმგებლობით მოეკიდოთ აღნიშნული ინფორმაციის დისტრიბუციას. საქართველოს მონაწილეობა ამ კოალიციაში იქნება სიმბოლურად წარმოდგენილი. უსაფრთხოების საბჭოზე შევთანხდმდით, რომ ამ კოალიციაში ჰუმანიტარული დახმარების კონტრიბუციას შეიტანს. ეს არ იქნება არავითარი სამხედრო სახის დახმარება“, - განაცხადა პრემიერმა.

ამერიკულმა გამოცემა Foreign Policy-მ საქართველოს ტერიტორიაზე სირიელი მეამბოხეების შესახებ გამოქვეყნებული სტატია განაახლა. სტატიაში ვკითხულობთ, რომ მეამბოხეების გაწვრთნის ინიციატივა ქართულმა მხარემ, აშშ-ის თავდაცვის მდივანს, ჩაკ ჰეიგელს თბილისში ვიზიტის დროს შესთავაზა. პენტაგონში შეთავაზებას განიხილავდნენ, თუმცა ინფორმაციის გასაჯაროების შემდეგ ქართველმა ოფიციალურმა პირებმა ეს ინიციატივა უარყვეს.