გირგვლიანის საქმის რა დეტალებზე საუბრობს გოგა ხაჩიძე

გირგვლიანის საქმის რა დეტალებზე საუბრობს გოგა ხაჩიძე - ,,ბევრი რამ აღმოვაჩინე...“

სოც.მედია - 19:54, 25 Sep, 2014

4701

უმცირესობის წევრი გოგა ხაჩიძე ინტერესდება თუ რატომ არ არის გახსნილი ამ დრომდე სანდო გირგვლიანის საქმე. დეპუტატი სოციალურ ქსელში „ქართული ოცნების“ ხელისუფლებაში ყოფნის დროს გირგვლიანის საქმეში აღმოჩენილ გარემოებებზე წერს, რომლის მიხედვით, „დანაშაულის ერთ-ერთი აქტიური და მნიშვნელოვანი მონაწილე დ.ქოქიაშვილია“.

„გუშინ, შემთხვევით რადიოში მოვისმინე: გირგვლიანის საქმეზე პროცესი გადაიდოო და ა.შ.

აქედან გამომდინარე ბუნებრივად დავინტერესდი, ახალი ხელისუფლების პირობებში გირგვლიანის საქმეზე მიმდინარე სასამართლოთი და ბევრი საინტერესო რამ აღმოვაჩინე.

უპირველეს ყოვლისა, ინტერესს იწვევს ის, თუ ზოგადად რა ახალი გარემოებები დაადგინა გამოძიებამ საქმეზე, რომელიც „ქართული ოცნების" მხრიდან მუდმივად პოლიტიკური სპეკულაციის საგანი იყო; რა ახალი გარემოებები დაადგინა გამოძიებამ იმ პირობებში, როდესაც „ქართული ოცნება" ხელისუფლებაშია, ხოლო აღნიშნულ საქმეზე „ნაციონალური მოძრაობის" მხრიდან პოლიტიკური ზეწოლა გამორიცხულია.

ვფიქრობ, თქვენთვისაც საინტერესო იქნება გაიგოთ რა ხდება ე.წ. გირგვლიანის საქმეზე, „ქართული ოცნების" ხელისუფლებაში ყოფნის პერიოდში.

მხოლოდ ფაქტები:

# მიუხედავად მრავალწლიანი პიარისა, დღევანდელმა გამოძიებამ მელნიკოვის ყოფნა ოქროყანის სასაფლაოზე ვერ დაადასტურა.

# ვერ დადასტურდა სანდრო გირგვლინის წამების და მკვლელობის ფაქტი. აღნიშნული კვალიფიკაცია დღევანდელი გამოძიების მიერვე იქნა მოხსნილი.

# როგორც დღევანდელი გამოძიებით ირკვევა, ოქროყანის სასაფლაოზე არ ყოფილა არც 8 და არც 12 ადამიანი.

# სამაგიეროდ დადგინდა, რომ ოქროყანაში ყოფილა მეხუთე პიროვნება ვინმე დ. ქოქიაშვილი.

რა დაადგინა დღევანდელმა გამოძიებამ დ. ქოქიაშვილზე:

* დადგენილია, რომ სწორედ ის მართავდა ავტომობილს, რომლითაც გირგვლიანი და ბუხაიძე აიყვანეს ოქროყანაში.

* სწორედ მისი მონაწილეობით მოხდა ორივე ამ პირის ჩასმა მანქანაში და როგორც ირკვევა სწორედ ის ადგა ოქროყანაში გირგვლიანს თავზე.

ანუ, შეიძლება ითქვას, რომ ქოქიაშვილი დანაშაულის ერთ-ერთი აქტიური და მნიშვნელოვანი მონაწილე იყო.

ამ ყველაფრის გათვალისწინებით, დღევანდელ პირობებში, ქოქიაშვილს მხოლოდ 2 წლით თავისუფლების აღკვეთა მიესაჯა(!!!)

შეგახსენებთ, წინა ხელისუფლების პირობებში, იგივე ქმედებაზე გასამართლებულ არცერთ პირს, ასეთი დაბალი სასჯელი არ ჰქონია მისჯილი.