მთელი ღამის განმავლობაში გადაუღებლად წვიმდა გურიაში. სტიქიით დაზარალებულ სოფლებში აღდგენითი სამუშაოები დღეიდან იწყება. მთელი ღამის განმავლობაში მობილიზებულნი იყვნენ საგანგებო ბრიგადები, სამაშველო ჯგუფები და საპატრულო პოლიცია.

გვიანობამდე იწმინდებოდა ჩოხატაურის გზაზე ნაბეღლავის ქარხანასთან მისასვლელი გზა, რომელიც ჩამოშლილმა მთის მასამ ჩახერგა.

მოვარდნილმა წყალმა პრობლემები არა მხოლოდ ინფრასტრუქტურას, არამედ ადგილობრივ მოსახლეობასაც შეუქმნა. შედეგად სოფელ შემოქმედიდან 10 ოჯახის ევაკუაცია მოხდა.

დანგრეულია წყალსაცავი, რის გამოც ოზურგეთი და რამდენიმე სოფელი სასმელი წყლის გარეშე დარჩა.

აჭარაში კი გამოდარებას ელიან. რეგიონი სტიქიამ მნიშვნელოვნად დააზარალა. წვიმამ და 6 ბალიანმა შტორმმა დატბორა ბათუმის, ქობულეთისა და ქედის მუნიციპალიტეტები.

სტიქიას ებრძოდა რამდენიმე სოფელიც. მაღალმთიან აჭარაში გადაუღებელ წვიმას მეწყერიც დაერთო, რის შედეგადაც ოჯახების ევაკუაცია გახდა საჭირო.

აჭარაში სპეციალური შტაბია შექმნილი, სადაც ყველა უწყების წარმომადგენლები არიან გაერთიანებულნი.