გარემოს დაცვის ყოფილი მინისტრი და საპარლამენტო უმცირესობის წევრი გოგა ხაჩიძე აჭარის რეგიონში მომხდარ სტიქიას ეხმაურება.

როგორც დეპუტატმა „ნიუპოსტთან“ საუბარში აღნიშნა, არ აპირებს სტიქიური უბედურება პოლიტიკური ქულების ჩასაწერად გამოიყენოს.

„ეს არის კონკრეტული ფორსმაჟორული სიტუაცია და ყველაფრის გათვლა პრაქტიკულად შეუძლებელია. მითუმეტეს ჩვენი ტიპის ქვეყანაში, სადაც ამ კუთხით უამრავი საკითხია მოსაგვარებელი. ახლა მთავარია სწორად, შეთანხმებულად და სწრაფად იმოქმედოს ხელისუფლებამ, ცენტრალურმაც და ადგილობრივმაც“,- აღნიშნა ხაჩიძემ.

დეპუტატმა საჭიროების შემთხვევაში მზაობა გამოთქვა და ხელისუფლებას სიტუაციის დარეგულირებაში დახმარება შესთავაზა.

„არსებობს საერთო პრობლემები, რომლის დროსაც ყველა ერთად უნდა ვიდგეთ, მიუხედავად პარტიული კუთვნილებისა“,- განაცხადა გოგა ხაჩიძემ.

შეგახსენებთ, რომ უხვი ნალექის გამო აჭარაში 5 ბალიანი შტორმი, მეწყერული მოვლენები და წყალდიდობა ფიქსირდება.