თედო ჯაფარიძე სამუშაო ვიზიტით აშშ-ში იმყოფება

პოლიტიკა - 19:08, 24 Sep, 2014

652

საქართველოს პარლამენტის საგარეო ურთიერთობათა კომიტეტის თავმჯდომარე თედო ჯაფარიძე სამუშაო ვიზიტით აშშ-ში იმყოფება.
ვიზიტის ფარგლებში ქალაქ ვაშინგტონში, სტრატეგიული და საერთაშორისო კვლევების ცენტრმა საჯარო ღონისძიებას უმასპინძლა, სახელწოდებით: "პროგრესი საქართველოს საგარეო და საშინაო პოლიტიკაში".
ღონისძიებაზე თედო ჯაფარიძემ ვრცლად ისაუბრა ქვეყნის წინაშე მდგარი საშინაო და საგარეო გამოწვევების შესახებ, შემდეგ კი აუდიოტორიიდან დასმულ შეკითხვებს უპასუხა.
საგარეო ურთიერთობათა კომიტეტის თავმჯდომარე ვაშინგტონში, ასევე შეხვდა აშშ-ის მშვიდობის ინსტიტუტის თავმჯდომარეს, დირექტორთა საბჭოს წევრს, სტივენ ჰედლის. შეხვედრა გაიმართა პრეზიდენტ ჯორჯ ბუშის (უმცროსი) ადმინისტრაციის აშშ-ის სახელმწიფო მდივნის მოადგილესთან და "არმიტიჯ ინთერნეიშენელ"-ის პრეზიდენტთან რიჩარდ არმიტიჯთან.
სტრატეგიული და საერთაშორისო კვლევების ცენტრში თედო ჯაფარიძე შეხვდა ამავე ორგანიზაციის მრჩეველსა და სამეურვეო საბჭოს წევრს, 1977-1981 წლებში ეროვნული უსაფრთხოების საკითხებში აშშ-ს პრეზიდენტის მრჩეველს, პროფესორ ზბიგნევ ბჟეზინსკის და ცენტრის ვიცე-პრეზიდენტს, ევროპის პროგრამის დირექტორს ჰეზერ კონლის.
აშშ-ს სენატში თედო ჯაფარიძემ შეხვედრები გამართა სენატორების, მარკო რუბიოსა და ბობ კორკერის მრჩევლებთან. სენატორ კორკერის მრჩეველთან, დენიელ ვაიდიჩთან შეხვედრის დროს განიხილული იქნა სენატორების კორკერისა და მენენდესის მიერ ინიცირებული "უკრაინის თავისუფლების მხარდამჭერი აქტი 2014" და რეგიონში უსაფრთხოების მხრივ შექმნილი ვითარება, ხოლო სენატორ რუბიოს მრჩევლებთან, ჯემი ფლაისთან და ვიქტორ სერვინოსთან შეხვედრისას ყურადღება დაეთმო საქართველოს ყოფილი ხელისუფლების წევრების მიმართ მიმდინარე სასამართლო და საგამოძიებო პროცესებს.