საქართველოს საგარეო საქმეთა მინისტრი გაერო-ს გენერალური ასამბლეის ფარგლებში ორმხრივ შეხვედრებს განაგრძობს. მაია ფანჯიკიძე 9 ქვეყნის საგარეო უწყებების ხელმძღვანელებს შეხვდა. საუბარი ძირითადად შეეხო საქართველოს ოკუპირებული რეგიონების არაღიარების პოლიტიკას.

საგარეო საქმეთა მინისტრი ასევე შეხვდა ამერიკის შეერთებული შტატების სახელმწიფო მდივნის მოადგილეს უილიამ ბერნს. მათ აღმოსავლეთ პარტნიორობის ქვეყნების წინაშე არსებულ გამოწვევებსა და ევროკავშირთან თანამშრომლობის მიმდინარეობაზე ისაუბრეს.

„ვიყენებთ ნიუ იორკში ყოფნის დღეებს იმისათვის, რომ შევხვდეთ იმ ქვეყნების მინისტრებს, რომელთანაც ჩვენ შეხვედრის სხვა შესაძლებლობები არ გვაქვს, ეს განსაკუთრებით ეხება აზიის, აფრიკის, ცენტრალური და ლათინური ამერიკის ქვეყნებს. ამ შეხვედრებზე ძირითადი თემა არის არაღიარების პოლიტიკა და ასევე ჩვენი რეზოლუციის მხარდაჭერა, ჩვენ გვქონდა მინისტრების დონეზე შეხვედრა სახელმწიფო მდივნის მოადგილესთან.

ამ შეხვედრაზე უკრაინის, მოლდოვისა და საქართველოს საგარეო საქმეთა მინისტრებთან ჩვენი რეგიონალური ვითარება იყო განხილული “. - განაცხადა მაია ფანჯიკიძემ.