საპარლამენტო უმცირესობის წევრი ირმა ნადირაშვილი საქართველოს ციხეებში არსებულ ვითარებაზე საუბრობს. დეპუტატმა ტელეკომპანია „რუსთავი 2“-ის გადაცემა „არჩევანში“ განაცხადა, რომ დღეისათვის ციხე გარედან მართავს კრიმინალს თბილისის ქუჩებში და მთელი ქვეყნის მასშტაბით:

„ციხეში აღარ ეშინიათ კრიმინალებს ჩაჯდომა კი არა, თქვენ ციხე სასიამოვნო ადგილად აქციეთ. როდესაც მე განცხადებები გავაკეთე ბიძინა ივანიშვილთან დაკავშირებით, ეს იყო გამომდინარა ამ ჩანაწერებიდან, მე მოვისმინე ერთერთი პატიმრის სატელეფონო ჩანაწერები, სადაც ის ამბობდა, რომ რაც ბიძინა ივანიშვილი მოვიდა, მათ ამოისუნთქეს, იმისთვის, რომ მათ ეს ყველაფერი შეინარჩუნონ, რომ დასჭირდეთ „ნაციონალური მოძრაობის“ წევრების სათითაოდ დახოცვა, ამას გააკეთებენ.

ამ მასალებთან დაკავშირებით თუ რამე კითხვა არსებობს, ეს არის პროკურატურის გამოძიების საგანი, მაგრამ დროზე საუბარი არის გაუმართლებელი, ამ ჩანაწერებში ეს ადამიანები თვითონ ამბობენ რომ საუბრობენ მას შემდეგ, რაც ბიძინა ივანიშვილი და „ქართული ოცნება“ მოვიდა ხელისუფლებაში. მე ნამდვილად არ მიკვირს მათი ასეთი დამოკიდებულება და გალაღება, იმიტომ, რომ ისინი თვითონ ხედავენ, რომ მთელი ქვეყანა იმართება ქურდული კანონებით და ქურდული წესებით, სწორედ აქედან გამომდინარე გრძნობენ ასეთ თავისუფლებას, მე ბრიფინგზე განვაცხადე კიდეც, რომ თავად ბიძინა ივანიშვილი არის ასეთი მენტალიტეტის მატარებელი, ის ქურდულად მართავს საქართველოს.

ბატონი ბიძინა, თავის შუშის სასახლეში გამოკეტილი გამოვა, არავითარი თანამდებობა არ უჭირავს, ხან პრეზიდენტს ურჩევს საქმეს, ხან ერთ მინისტრს, ხან მეორეს, ვინ არის ეს ადამიანი? რატომ გვირჩევს საქმეებს? რატომ აქვთ ასეთი სენტიმენტები ამ ადამიანის მიმართ შავი სამყაროს წარმომადგენლებს, ეს არის ჩემთვის სრულებით გაურკვეველი.

ის რომ ციხეს მართლაც მართავენ კრიმინალები, ეს არის ღია, მე არ ვამბობ, რომ „ნაციონალური მოძრაობის“ მმართველობის დროს არ იყო ციხეში პრობლემები, მაგრამ იმის ნაცვლად, რომ გამოესწორებინათ სიტუაცია, მივიღეთ ვითარება, როდესაც ორ დღეში სამი პატიმარი გარდაიცვალა ციხეში, მთავარი არის ის, რომ კრიმინალურმა სამყარომ უკვე ააწყო თავისი ქსელი, ეს ყველაფერი გადმოდის ჩვენს ოჯახებზე, ჩვენს უსაფრთხოებაზე. ციხე გარედან მართავს კრიმინალს თბილისის ქუჩებში“, - განაცხადა ირმა ნადირაშვილმა.