საგარეო საქმეთა მინისტრი მაია ფანჯიკიძე საქართველოში სირიელი ამბოხებულების საწვრთნელი ბაზის შექმნას კატეგორიულად გამორიცხავს.

როგორც მან „Foreign Policy”–ს მიერ გავრცელებული ინფორმაციის კომენტირებისას აღნიშნა, ანტიტერორისტულ ოპერაციებში საქართველოს მონაწილეობა მხოლოდ ჰუმანიტარული ხასიათის იქნება.

„მე ძალიან გარკვევით ვთქვი, რომ ჩვენი მონაწილეობა იქნება ჰუმანიტარული ხასიათის. ეს მინდა, ძალიან მკაფიოდ ვთქვა – კატეგორიულად გამოვრიცხავ რაიმე სახის სამხედრო მონაწილეობას და ასევე საწვრთნელი ბაზის შექმნას საქართველოში“,- განაცხადა ფანჯიკიძემ.

საქართველოში სირიელი ამბოხებულების საწვრთნელი ცენტრის შესაძლო შექმნის თაობაზე ინფორმაცია გამოცემა „Foreign Policy”–მ გაავრცელა. უცხოური მედიასაშუალება აღნიშნულ ცნობას ამერიკის შეერთებული შტატების სახელმწიფო დეპარტამენტის წარმომადგენლელზე დაყრდნობით ავრცელებს. აღსანიშნავია, რომ ამ ინფორმაციას საქართველოს ოფიციალური უწყებები და აშშ–ში საქართველოს ელჩი უარყოფენ. ინფორმაციას ნაწილობრივ მხოლოდ თავდაცვის სამინისტრო ადასტურებს.