თბილისის საკრებულომ სამი ახალი საქალაქო სამსახურის ჩამოყალიბებას მხარი დაუჭირა. საკრებულომ ახლად შექმნილი სამი საქალაქო სამსახურის, კერძოდ, ჯანდაცვისა და სოციალური მომსახურების, განათლების, სპორტისა და ახალგაზრდობისა და კულტურის საქალაქო სამსახურების დებულებები და საშტატო ნუსხები დაამტკიცა. საკრებულოს მიერ 2006 წლის დებულებაში შეტანილი ცვლილება ერთი თვის შემდეგ ამოქმედდება და სოციალური მომსახურებისა და კულტურის საქალაქო სამსახურის ნაცვლად სამი ახალი საქალაქო სამსახური ჩამოყალიბდება.

სხდომაზე ამ საკითხს მხარი არ დაუჭირა ფრაქცია "გაერთიანებული დემოკრატიული მოძრაობის" თავმჯდომარემ ზაზა ვეკუამ და საკრებულოს "ნაციონალური მოძრაობის" წევრებმა.

ოპოზიციის აზრით, მმართველი გუნდი ახალ შტატებს ნათესავებისთვის, კონკრეტულად კი კახი კალაძის ცოლისძმისთვის ქმნის.

„მაშინ როდესაც, თბილისის ბიუჯეტი თითქმის 13 მილიონი ლარით სეკვესტრირებულია, მაშინ როდესაც დავით ნარმანია თავად აღიარებს საბიუჯეტო პრობლემებს და საბიუჯეტო კრიზისს, მაშინ როდესაც თბილისის მერიიდან დანაშაულებრივი იძულების გზით ყრიან იქ წლების განმავლობაში მომუშავე პროფესიონალ ადამიანებს, კახი კალაძის ცოლისძმისთვის თანამდებობის შესაქმნელად. ხდება სამსახურების გაყოფა და ახალი საშტატო ერთეულების დამატება და ადმინისტრციული ხარჯის გაზრდა“,- განაცხადა თბილისის საკრებულოს უმცირესობის წევრმა ირაკლი აბესაძემ.

საკითხი სხდომაზე თბილისის მერის მოადგილე ალუდა გოგლიჩიძემ წარადგინა.