"ზვიად, ამას ვირეშმაკობა ჰქვია, პრეზიდენტის გასამართლებას და შეწყალებას კი პოლიტიკური დევნა"

პოლიტიკა - 14:49, 23 Sep, 2014

2421

"დემოკრატიული განვითარების ეროვნული ცენტრის“ ხელმძღვანელი, მუხრან ბურჭულაძე საპარლამენტო უმრავლესობის წევრის ზვიად ძიძიგურის იმ განცხადებას გამოეხმაურა, სადაც ძიძიგური ამბობს, რომ მიხეილ სააკაშვილის დაპატიმრების შემთხვევაში, თუ ეს ქვეყნის ინტერესებს დააზარალებს, შეწყალების მექანიზმი უნდა ამოქმედდეს.

„ძიძიგურმა პრეზიდენტ სააკაშვილის დევნის გეგმა გაახმოვანა რაც მხოლოდ მას არ უნდა ეკუთვნოდეს. ანუ, როგორც ჩანს კოალიციის რიგებში ამ აზრს ჰყავს მხარდამჭერები და ის ერთი არაა ვინც სააკაშვილის დევნის მთელ სცენარს თხზავს. ის რაც ძიძიგურისგან მოვისმინეთ არის ყოვლად მიუღებელი და მითუმეტეს მეგობარი ქვეყნებისთვის, რადგან კანონმდებელმა პირდაპირ მიუთითა სასამართლოსაც, მთავრობასაც და საქართველოს მოქმედ პრეზიდენტსაც თუ რა სახით უნდა განხორციელდეს სააკაშვილის დევნა. ერთი შეხედვით ეს მარტივად ჟღერს, თუმცა აქ იკვეთება თუ რაოდენ პოლიტიზირებულია პროკურატურა და რა სახის ზეწოლას განიცდის სასამართლო",- განაცხადა მუხრან ბურჭულაძემ.

მისივე თქმით, შეწყალების მექანიზმი ვერ ამოქმედდება პირის მიმართ გამამტყუნებელი განაჩენის დადგომის და მისი ბრალეულად ცნობის გარეშე.

"ამასთან "ოცნებამ" იმდენად შეტოპა, რომ თავს ვეღარ იძვრენს მდგომარეობიდან, ხელისუფლება გარკვეულ დისკომფორტს განიცდის ყოფილი მმართველი პარტიის წევრების პოლიტიკური დევნის გამო და მას ხშირად უწევს თავის მართლება. დღეს ყველა აცნობიერებს რომ სახელმწიფოს ამით წარმოუდგენელი ზიანი მიადგება, ხოლო პოლიტიკური პატიმრები და ოპოზიციის დევნა საბოლოოდ შეიწირავს მოძალადე ხელისუფლებას. ამიტომაც ვერ დამალა ძიძიგურმა და გაახმოვანა ვითომ თავის დაძვრენის გეგმა.

ამას სხვაგვარად ვირეშმაკობა ჰქვია ზვიად, ხოლო პრეზიდენტის გასამართლებას და შეწყალებას პოლიტიკური დევნა“,- აღნიშნა ბურჭულაძემ.

ზვიად ძიძიგური: თუ სასამართლო მიხეილ სააკაშვილს გაამტყუნებს და მისი დაპატიმრება, როგორც ყოფილი პრეზიდენტისა, ქვეყნისთვის პოლიტიკურად დამაზარალებელი იქნება, არსებობს შეწყალების მექანიზმი. ვფიქრობ, ასეთ შემთხვევაში ეს მექანიზმი უნდა იქნას ამოქმედებული და პრეზიდენტმა გიორგი მარგველშვილმა ექსპერზიდენტი მიხეილ სააკაშვილი შეიწყალოს. თუ კაცს დანაშაული აქვს ჩადენილი და მისი გამოძიება არ მოხდება, კიდევ უფრო აზარალებს ქვეყანას".