მოსახლეობისა და განვითარების შესახებ, საერთაშორისო კონფერენციის სამოქმედო პროგრამის შესრულების ანგარიში წარადგინა საქართველოს პრემიერმინისტრმა, გაერო-ს გენერალური ასამბლეის 29-ე სპეციალურ სესიაზე.

„ჩემი ქვეყანა ამაყობს იმით, რომ უერთდება საერთაშორისო თანამეგობრობას და კიდევ ერთხელ ადასტურებს მხარდაჭერას მოსახლეობისა და განვითარების შესახებ საერთაშორისო კონფერენციის სამოქმედო პროგრამის მიმართ და მზად არის ამ ძალისხმევაში შემდგომი წვლილის შესატანად“, - განაცხადა ღარიბაშვილმა.

აქცენტი ასევე გაკეთდა დევნილებზე, რომელთა ცხოვრების პირობების გაუმჯობესება პრემიერმა მთავრობის ძირითად მიზნად დაასახელა. ღარიბაშვილმა ზოგადად მოსახლეობის პირობების გაუმჯობესებისთვის წამოწყებულ რეფორმებზე ისაუბრა.

„ჩემი ქვეყანა მუშაობს მთელ რიგ ინიციატივებზე, რომლებიც ორიენტირებულია ჩვენს მოსახლეობაზე ზრუნვასა და ასევე მისი კეთილდღეობის გაუმჯობესებაზე. გასულ წელს ყველაზე მნიშვნელოვანი მოვლენა იყო მთავრობის მიერ საყოველთაო ჯანდაცვის პროგრამის დაწყება, რომელმაც უზრუნველყო საქართველოს თითოეული მოქალაქე ამბულატორიული, სტაციონალური და გადაუდებელი სასწრაფო სამედიცინო მომსახურების საბაზისო პაკეტით.

საქართველოს ასევე აქვს ყოვლისმომცველი სოციალური დაცვის სტრატეგია, რომლის ძირითადი აქცენტები მიმართულია ღარიბი და სოციალურად დაუცველი ადამიანების დაცვასა და ხანდაზმულ ასაკში სიღარიბისგან დაცვაზე. ახლად დაარსებული სახელმწიფო და კერძო სექტორის მომცველი „სოლიდარობის ფონდი“ მოახდენს არასაბიუჯეტო რესურსების მობილიზაციას სოციალურად ყველაზე დაუცველი მოსახლეობის მხარდასაჭერად“, - განაცხადა ღარიბაშვილმა.