სასჯელაღსრულების მინისტრი გიორგი მღებრიშვილი უარყოფს ინფორმაციას, რომ გლდანის ციხეში გიორგი ოქროპირიძესა (ოქრიკასა) და თენგიზ ერისთავის შეხვედრას გლდანის ციხეში დაძაბულობა მოჰყვა. ამის შესახებ მღებრიშვილმა ტელეკომპანია „იმედის“ ეთერში განაცხადა.

„მსგავს ფაქტს ადგილი არ ჰქონია. რაც შეეხება კითხვას, დაისჯებოდნენ თუ არა მსგავსი ფაქტის შემთხვევაში ბადრაგები, დღეს ნახეთ კადრები. ის ადამიანები ვინც მსჯავრდებულის გადაყვანა-გადმოყვანაზე პასუხისმგებლები იყნენ გაექცათ პატიმარი. ჩვენ დავაკავეთ არა მხლოდ ისინი, არამედ გავათავისუფლეთ დაკავებული თანამდებობიდან მათი ხელმძღვანელიც. მე, ისევე როგორც მსჯავრდებულების მიმართ ვიქნები მკაცრი, ისე ვიქნები მკაცრი ჩემი თანამშრომლების მიმართ“, - განაცხადა მღებრიშვილმა.

ორი დღის წინ გავრცელდა ინფორმაცია, რომ თენგიზ ერისთავი და მისი მეგობრის მკვლელობაში ბრალდებული „ოქრიკა“ ერთ ციხეში იმყოფებიან. არსებული ინფორმაციით, ისინი ერთმანეთს შეხვდნენ, რასაც დაძაბულობა მოჰყვა. ფაქტს სახალხო დამცველის წარმომადგენელი შეესწრო.