„სპორტსმენებმა პრეზიდიუმს ლუკა კურტანიძის გადადგომის მოთხოვნა ფაქტებითა და არგუმენტებით დაუსაბუთეს“, - ამის შესახებ მოჭიდავემ რამაზ ნოზაძემ განაცხადა.

მისი თქმით, კურტანიძის შემცვლელად უნდა მოვიდეს ისეთი პირი, რომელსაც ჭიდაობა ეყვარება.

"თუ ეს მოთხოვნა არ დაკმაყოფილდა, უკვე მეშინია, რა მოხდება. ფილმ "ცისფერ მთებში" რომ არის გაიტანეთო, გაიტანონ რა, ეს კაცი, სანამ ფიზიკური დაპირისპირება და ვიღაცის მსხვერპლი არ მომხდარა. ეგ უნდათ, თუ რა უნდათ, ვერ გამიგია", - აღნიშნა რამაზ ნოზაძემ.

სპორტისა და ახალგაზრდობის საქმეთა სამინისტროში ჭიდაობის ფედერაციის პრეზიდიუმის სხდომა მიმდინარეობს, რომელსაც ჭიდაობის ფედერაციის პრეზიდენტი ლუკა კურტანიძე ესწრება. შენობაში შესვლამდე მას სპორტსმენებმა კვერცხები დაუშინეს.