გარემოსა და ბუნებრივი რესურსების დაცვის მინისტრი ელგუჯა ხოკრიშვილი ამერიკის შეერთებულ შტატებში იმყოფება, სადაც კლიმატთან დაკავშირებულ საკითხებში ევროკავშირის სპეციალური წარმომადგენლის, კონი ჰიდეგაარდის მიერ ორგანიზებული მრგვალი მაგიდა გაიმართა.

მრგვალ მაგიდაში მონაწილეობა საქართველოს გარემოსა და ბუნებრივი რესურსების დაცვის მინისტრმა ელგუჯა ხოკრიშვილმა და მინისტრის მოადგილემ თეიმურაზ მურღულიამ მიიღეს.

ელგუჯა ხოკრიშვილმა შეხვედრის მონაწილეებს საქართველოში კლიმატის ცვლილების კუთხით მიმდინარე საქმიანობა გააცნო და გამოთქვა მზადყოფნა, 2015 წლისთვის წარადგინოს პოზიცია „ახალი 2015 წლის ხელშეკრულების“ ფარგლებში სათბურის გაზების ემისიის შემცირების ვალდებულებასთან დაკავშირებით. მრგვალ მაგიდაში მონაწილეობა ევროპის, აზიის, აფრიკისა და ლათინური ამერიკის ქვეყნების გარემოს დაცვის მინისტრებმა მიიღეს.

შეხვედრის მთავარი მიზანი იყო კლიმატის ცვლილების კონვენციით „ახალი 2015 წლის ხელშეკრულებასთან“ მიმართებულებით ქვეყნების თვალთახედვის შეჯერება საერთო პოზიციისაკენ სწრაფვის მიზნით. მრგვალი მაგიდა წინ უძღოდა გაეროს გენერალური მდივნის, ბან კი–მუნის მიერ 23 სექტემბერს ნიუ–იორკშივე დაგეგმილ უმაღლესი დონის შეხვედრას – კლიმატის ცვლილების სამიტს, რომელშიც მონაწილეობას მსოფლიოს პრაქტიკულად ყველა ქვეყნის მეთაური მიიღებს. სამიტზე ჩვენს ქვეყანას პრემიერ–მინისტრი ირაკლი ღარიბაშვილი წარადგენს.